yaad aa gaya to bahne lagin aankhen ju ki tarh

yaad aa gayā to bahne lagīñ āñkheñ jū kī tarh

kuchh aa ga.ī thī sarv-e-chaman meñ kisū kī tarh

chaspāñ-qabā vo shoḳh sadā ġhusse hī rahā

chīn-e-jabīñ se us kī uThā.ī utū kī tarh

gaalī laḌā.ī aage to tum jānte na the

ab ye nikālī tum ne na.ī guftugū kī tarh

ham jānte the taaza binā-e-jahāñ ko lek

ye manzil-e-ḳharāb huī hai kabhū kī tarh

sarsabz ham hue na the jo zard ho chale

is kisht meñ paḌī ye hamāre numū kī tarh

ve din kahāñ ki mast-e-sar-andāz ḳhum meñ the

sar ab to jhojhrā hai shikasta subū kī tarh

taskīn dil kī kab huī sair-e-chaman kiye

go phuul dil meñ aa ga.e kuchh us ke rū kī tarh

āḳhir ko us kī raah meñ ham aap gum hue

muddat meñ paa.ī yaar kī ye justujū kī tarh

kyā log yuuñ hī ātish-e-sozāñ meñ jā paḌe

kuchh hogī jaltī aag meñ us tund-ḳhū kī tarh

Dartā huuñ chāk-e-dil ko mire palkoñ se siye

nāzuk nazar paḌī hai bahut us rafū kī tarh

dhote haiñ ashk-e-ḳhūnī se dast-o-dahan ko 'mīr'

taur-e-namāz kyā hai jo ye hai vuzū kī tarh

yaad aa gaya to bahne lagin aankhen ju ki tarh

kuchh aa gai thi sarw-e-chaman mein kisu ki tarh

chaspan-qaba wo shoKH sada ghusse hi raha

chin-e-jabin se us ki uThai utu ki tarh

gali laDai aage to tum jaante na the

ab ye nikali tum ne nai guftugu ki tarh

hum jaante the taza bina-e-jahan ko lek

ye manzil-e-KHarab hui hai kabhu ki tarh

sarsabz hum hue na the jo zard ho chale

is kisht mein paDi ye hamare numu ki tarh

we din kahan ki mast-e-sar-andaz KHum mein the

sar ab to jhojhra hai shikasta subu ki tarh

taskin dil ki kab hui sair-e-chaman kiye

go phul dil mein aa gae kuchh us ke ru ki tarh

aaKHir ko us ki rah mein hum aap gum hue

muddat mein pai yar ki ye justuju ki tarh

kya log yun hi aatish-e-sozan mein ja paDe

kuchh hogi jalti aag mein us tund-KHu ki tarh

Darta hun chaak-e-dil ko mere palkon se siye

nazuk nazar paDi hai bahut us rafu ki tarh

dhote hain ashk-e-KHuni se dast-o-dahan ko 'mir'

taur-e-namaz kya hai jo ye hai wuzu ki tarh