yan apni aankhen phir gain par wo na aa phira

yaañ apnī āñkheñ phir ga.iiñ par vo na aa phirā

dekhā na bad-gumān hamārā bhalā phirā

aaya na phir vo ā.ina-rū Tuk nazar mujhe

maiñ muñh par apne ḳhaak male jā-ba-jā phirā

kyā aur jī ruñdhe kisū kā tere hijr meñ

sau baar apne muñh se jigar to gayā phirā

allah re dilkashī kahīñ dekhā jo garm-e-nāz

juuñ saaya us ke saath malak phir lagā phirā

sun liijo ek baar musāfir hī ho gayā

bīmār-e-‘ishq gor se go bārhā phirā

kah vo shikasta-pā hama-hasrat na kyūñke jaa.e

jo ek din na terī galī meñ chalā phirā

tāle' phire sipahr phirā qalb phir ga.e

chande vo rashk-e-māh jo ham se judā phirā

par be-namak hai milne kī is vaqt meñ talāsh

baare vo rabt-o-dostī sab kā maza phirā

aañsū girā na rāz-e-mohabbat kā paas kar

maiñ jaise abr barsoñ ta.iiñ dil bharā phirā

be-sarfa rone lag ga.e ham bhī agar kabhū

to dekhiyo ki bādiya saarā bahā phirā

banda hai phir kahāñ kā jo sāhib ho be-dimāġh

us se ḳhudā.ī phirtī hai jis se ḳhudā phirā

ḳhāna-ḳharāb 'mīr' bhī kitnā ġhayūr thā

marte muā par us ke kabhū ghar na jā phirā

yan apni aankhen phir gain par wo na aa phira

dekha na bad-guman hamara bhala phira

aaya na phir wo aaina-ru Tuk nazar mujhe

main munh par apne KHak male ja-ba-ja phira

kya aur ji rundhe kisu ka tere hijr mein

sau bar apne munh se jigar to gaya phira

allah re dilkashi kahin dekha jo garm-e-naz

jun saya us ke sath malak phir laga phira

sun lijo ek bar musafir hi ho gaya

bimar-e-‘ishq gor se go barha phira

kah wo shikasta-pa hama-hasrat na kyunke jae

jo ek din na teri gali mein chala phira

tale' phire sipahr phira qalb phir gae

chande wo rashk-e-mah jo hum se juda phira

par be-namak hai milne ki is waqt mein talash

bare wo rabt-o-dosti sab ka maza phira

aansu gira na raaz-e-mohabbat ka pas kar

main jaise abr barson tain dil bhara phira

be-sarfa rone lag gae hum bhi agar kabhu

to dekhiyo ki baadiya sara baha phira

banda hai phir kahan ka jo sahib ho be-dimagh

us se KHudai phirti hai jis se KHuda phira

KHana-KHarab 'mir' bhi kitna ghayur tha

marte mua par us ke kabhu ghar na ja phira