yan hum bara-e-bait jo be-KHanuman rahe

yaañ ham barā-e-bait jo be-ḳhānumāñ rahe

so yuuñ rahe ki jaise koī mehmāñ rahe

thā mulk jin ke zer-e-nagīñ saaf miT ga.e

tum is ḳhayāl meñ ho ki nām-o-nishāñ rahe

aañsū chale hī aane lage muñh pe muttasil

kyā kiije ab ki rāz-e-mohabbat nihāñ rahe

ham jab nazar paḌeñ to vo abrū ko ḳham kare

teġh apne us ke kab ta.iiñ yuuñ darmiyāñ rahe

koī bhī apne sar ko kaTātā hai yuuñ vale

juuñ sham.a kyā karūñ jo na merī zabāñ rahe

ye donoñ chashme ḳhuun se bhar duuñ to ḳhuub hai

sailāb merī āñkhoñ se kab tak ravāñ rahe

dekheñ to misr-e-husn meñ kyā ḳhvāriyāñ khiñchīñ

ab tak to ham aziiz rahe haiñ jahāñ rahe

maqsūd gum kiyā hai tab aisā hai iztirāb

chakkar meñ varna kaahe ko yuuñ āsmāñ rahe

kyā apnī un kī tum se bayāñ kījiye ma.āsh

kiiñ muddatoñ rakhā jo tanik mehrbāñ rahe

gah shaam us ke mū se hai gah rū se us ke sub.h

tum chāho ho ki ek sā hī yaañ samāñ rahe

kyā nazr-e-teġh-e-ishq ko sar-sabz maiñ kiyā

is ma.arke meñ khet bahut ḳhasta-jāñ rahe

is tangnā-e-dahr meñ tangī nafas ne kī

juuñ sub.h ek dam hī rahe ham jo yaañ rahe

ik qāfile se gard hamārī na Tuk uThī

hairat hai 'mīr' apne ta.iiñ ham kahāñ rahe

yan hum bara-e-bait jo be-KHanuman rahe

so yun rahe ki jaise koi mehman rahe

tha mulk jin ke zer-e-nagin saf miT gae

tum is KHayal mein ho ki nam-o-nishan rahe

aansu chale hi aane lage munh pe muttasil

kya kije ab ki raaz-e-mohabbat nihan rahe

hum jab nazar paDen to wo abru ko KHam kare

tegh apne us ke kab tain yun darmiyan rahe

koi bhi apne sar ko kaTata hai yun wale

jun shama kya karun jo na meri zaban rahe

ye donon chashme KHun se bhar dun to KHub hai

sailab meri aankhon se kab tak rawan rahe

dekhen to misr-e-husn mein kya KHwariyan khinchin

ab tak to hum aziz rahe hain jahan rahe

maqsud gum kiya hai tab aisa hai iztirab

chakkar mein warna kahe ko yun aasman rahe

kya apni un ki tum se bayan kijiye maash

kin muddaton rakha jo tanik mehrban rahe

gah sham us ke mu se hai gah ru se us ke subh

tum chaho ho ki ek sa hi yan saman rahe

kya nazr-e-tegh-e-ishq ko sar-sabz main kiya

is marke mein khet bahut KHasta-jaan rahe

is tangna-e-dahr mein tangi nafas ne ki

jun subh ek dam hi rahe hum jo yan rahe

ek qafile se gard hamari na Tuk uThi

hairat hai 'mir' apne tain hum kahan rahe