ye ghalat ki main piya hun qadah-e-sharab tujh bin

ye ġhalat ki maiñ piyā huuñ qadah-e-sharāb tujh bin

na gale se mere utrā kabhū qatra-e-āb tujh bin

yahī bastī āshiqoñ kī kabhū sair karne chal tū

ki mahalle ke mahalle paḌe haiñ ḳharāb tujh bin

maiñ lahū piyūñ huuñ ġham meñ evaz-e-sharāb saaqī

shab-e-meġh ho ga.ī hai shab-e-māhtāb tujh bin

ga.ī umr merī saarī jaise sham.a baav ke biich

yahī ronā jalnā galnā yahī iztirāb tujh bin

sabhī ātishīñ haiñ naale sabhī zamharīrī aaheñ

mirī jaan par rahā hai ġharaz ik azaab tujh bin

tire ġham kā shukr-e-ne.amat karūñ kyā ai muġhbache maiñ

na huā ki maiñ na khāyā jigar-e-kabāb tujh bin

nahīñ jiite jī to mumkin hameñ tujh baġhair sonā

magar āñ-ki mar ke kiije tah-e-ḳhāk ḳhvāb tujh bin

bure haal ho ke martā jo dirang 'mīr' kartā

ye bhalā huā sitamgar ki muā shitāb tujh bin

ye ghalat ki main piya hun qadah-e-sharab tujh bin

na gale se mere utra kabhu qatra-e-ab tujh bin

yahi basti aashiqon ki kabhu sair karne chal tu

ki mahalle ke mahalle paDe hain KHarab tujh bin

main lahu piyun hun gham mein ewaz-e-sharab saqi

shab-e-megh ho gai hai shab-e-mahtab tujh bin

gai umr meri sari jaise shama baw ke bich

yahi rona jalna galna yahi iztirab tujh bin

sabhi aatishin hain nale sabhi zamhariri aahen

meri jaan par raha hai gharaz ek azab tujh bin

tere gham ka shukr-e-neamat karun kya ai mughbache main

na hua ki main na khaya jigar-e-kabab tujh bin

nahin jite ji to mumkin hamein tujh baghair sona

magar aan-ki mar ke kije tah-e-KHak KHwab tujh bin

bure haal ho ke marta jo dirang 'mir' karta

ye bhala hua sitamgar ki mua shitab tujh bin