yun kab hua hai pyare pas apne tum bula lo

yuuñ kab huā hai pyāre paas apne tum bulā lo

do bāteñ gar likhūñ maiñ dil ko Tuk ik lagā lo

ab jo nasīb meñ hai so dekh lūñgā maiñ bhī

tum dast-e-lutf apnā sar se mire uThā lo

jumbish bhī us ke aage hoñToñ ko ho to kahiyo

yuuñ apne taur par tum bāteñ bahut banā lo

do na.aroñ hī meñ shab ke hogā makān hū kā

sun rakkho kaan rakh kar ye baat bastī vaalo

nām-e-ḳhudā sitam meñ tum nāmvar to ho hī

par ek do ko yuuñ hī lillāh maar Daalo

zulf aur ḳhāl-o-ḳhat kā saudā nahīñ hai achchhā

yaaro bane to sar se jald is balā ko Taalo

yārān-e-rafta aise kyā dūr-tar ga.e haiñ

Tuk kar ke tez-gāmī us qāfile ko jā lo

bāzārī saare ve hī kahte haiñ raaz baiThe

jin ko hameñ kahā hai tum muñh se mat nikālo

yuuñ rafta aur be-ḳhud kab tak rahā karoge

tum ab bhī 'mīr' sāhib apne ta.iiñ sa.mbhālo

yun kab hua hai pyare pas apne tum bula lo

do baaten gar likhun main dil ko Tuk ek laga lo

ab jo nasib mein hai so dekh lunga main bhi

tum dast-e-lutf apna sar se mere uTha lo

jumbish bhi us ke aage honTon ko ho to kahiyo

yun apne taur par tum baaten bahut bana lo

do naron hi mein shab ke hoga makan hu ka

sun rakkho kan rakh kar ye baat basti walo

nam-e-KHuda sitam mein tum namwar to ho hi

par ek do ko yun hi lillah mar Dalo

zulf aur KHal-o-KHat ka sauda nahin hai achchha

yaro bane to sar se jald is bala ko Talo

yaran-e-rafta aise kya dur-tar gae hain

Tuk kar ke tez-gami us qafile ko ja lo

bazari sare we hi kahte hain raaz baiThe

jin ko hamein kaha hai tum munh se mat nikalo

yun rafta aur be-KHud kab tak raha karoge

tum ab bhi 'mir' sahib apne tain sambhaalo