yun qaidiyon se kab tain hum tang-tar rahen

yuuñ qaidiyoñ se kab ta.iiñ ham tang-tar raheñ

jī chāhtā hai jā ke kisū or mar raheñ

ai kaash ham ko sukr kī hālat rahe mudām

tā haal kī ḳharābī se ham be-ḳhabar raheñ

rahte haiñ yuuñ havās pareshāñ ki juuñ kahīñ

do tiin aa ke lauTe musāfir utar raheñ

vā'da to tab ho sub.h kā jab ham bhī jāñ-balab

jaise charāg-e-āḳhir-e-shab tā-sahar raheñ

āvārgī kī sab haiñ ye ḳhāna-ḳharābiyāñ

log aaveñ dekhne ko bahut ham jo ghar raheñ

ham ne bhī nazr kī hai ki phiriye chaman ke gird

yārab qafas ke chhūTne tak bāl-o-par raheñ

in dilbaroñ kī aañkh nahīñ jā-e-e'timād

jab tak raheñ ye chāhiye pesh-e-nazar raheñ

fardā kī fikr aaj nahīñ muqtazā-e-'aql

kal kī bhī dekh leveñge kal ham agar raheñ

teġh-o-tabar rakhā na karo paas 'mīr' ke

aisā na ho ki aap ko zaa.e' ve kar raheñ

yun qaidiyon se kab tain hum tang-tar rahen

ji chahta hai ja ke kisu or mar rahen

ai kash hum ko sukr ki haalat rahe mudam

ta haal ki KHarabi se hum be-KHabar rahen

rahte hain yun hawas pareshan ki jun kahin

do tin aa ke lauTe musafir utar rahen

wa'da to tab ho subh ka jab hum bhi jaan-balab

jaise charag-e-aKHir-e-shab ta-sahar rahen

aawargi ki sab hain ye KHana-KHarabiyan

log aawen dekhne ko bahut hum jo ghar rahen

hum ne bhi nazr ki hai ki phiriye chaman ke gird

yarab qafas ke chhuTne tak baal-o-par rahen

in dilbaron ki aankh nahin ja-e-e'timad

jab tak rahen ye chahiye pesh-e-nazar rahen

farda ki fikr aaj nahin muqtaza-e-'aql

kal ki bhi dekh lewenge kal hum agar rahen

tegh-o-tabar rakha na karo pas 'mir' ke

aisa na ho ki aap ko zae' we kar rahen