zindagi hoti hai apni gham ke mare dekhiye

zindagī hotī hai apnī ġham ke maare dekhiye

muuñd liiñ āñkheñ idhar se tum ne pyāre dekhiye

laḳht-e-dil kab tak ilāhī chashm se Tapkā kareñ

ḳhaak meñ tā-chand aise la.al-pāre dekhiye

ho chukā roz-e-jazā ab ai shahīdān-e-vafā

chauñkte haiñ ḳhūn-e-ḳhufta kab tumhāre dekhiye

rāh-e-dūr-e-ishq meñ ab to rakhā ham ne qadam

rafta rafta pesh kyā aatā hai baare dekhiye

sīna-e-majrūh bhī qābil huā hai sair ke

ek din to aan kar ye zaḳhm saare dekhiye

ḳhanjar-e-bedād ko kyā dekhte ho dam-ba-dam

chashm se insāf kī siine hamāre dekhiye

ek ḳhuuñ ho bah gayā do rote hī rote ga.e

dīda-o-dil ho ga.e haiñ sab kināre dekhiye

shust-o-shū kā us kī paanī jam.a ho kar mah banā

aur muñh dhone ke chhīñToñ se sitāre dekhiye

rah ga.e sote ke sote kārvāñ jaatā rahā

ham to 'mīr' us rah ke ḳhvābīda haiñ haare dekhiye

zindagi hoti hai apni gham ke mare dekhiye

mund lin aankhen idhar se tum ne pyare dekhiye

laKHt-e-dil kab tak ilahi chashm se Tapka karen

KHak mein ta-chand aise lal-pare dekhiye

ho chuka roz-e-jaza ab ai shahidan-e-wafa

chaunkte hain KHun-e-KHufta kab tumhaare dekhiye

rah-e-dur-e-ishq mein ab to rakha hum ne qadam

rafta rafta pesh kya aata hai bare dekhiye

sina-e-majruh bhi qabil hua hai sair ke

ek din to aan kar ye zaKHm sare dekhiye

KHanjar-e-bedad ko kya dekhte ho dam-ba-dam

chashm se insaf ki sine hamare dekhiye

ek KHun ho bah gaya do rote hi rote gae

dida-o-dil ho gae hain sab kinare dekhiye

shust-o-shu ka us ki pani jama ho kar mah bana

aur munh dhone ke chhinTon se sitare dekhiye

rah gae sote ke sote karwan jata raha

hum to 'mir' us rah ke KHwabida hain haare dekhiye