aaiye paDh len darud-e-pak barkat ke liye

aa.iye paḌh leñ darūd-e-pāk barkat ke liye

apne īmān-o-yaqīñ kī zeb-o-zīnat ke liye

jab mire sarkār haiñ merī shafā'at ke liye

phir mujhe fikr-o-taraddud kyoñ ho jannat ke liye

un sahāba kī 'aqīdat ko maiñ kartā huuñ salām

jaañ luTā dete the jo ik ek sunnat ke liye

jab kiyā bū-jahl ne zāt-e-nubuvvat par savāl

sang-reze bol uThe pās-e-risālat ke liye

baḳhsh diiñ mere nabī ne beTiyoñ ko 'azmateñ

yā'nī jism-e-mustafā bhī hai tilāvat ke liye

dosto gāoge kab tak zulf aur chehre ke giit

vaqf kar do zindagī aaqā kī mid.hat ke liye

sochtā huuñ maiñ bhī kāfir hotā yā mushrik 'zakī'

jo mire aaqā nahīñ aate hidāyat ke liye

aaiye paDh len darud-e-pak barkat ke liye

apne iman-o-yaqin ki zeb-o-zinat ke liye

jab mere sarkar hain meri shafa'at ke liye

phir mujhe fikr-o-taraddud kyon ho jannat ke liye

un sahaba ki 'aqidat ko main karta hun salam

jaan luTa dete the jo ek ek sunnat ke liye

jab kiya bu-jahl ne zat-e-nubuwwat par sawal

sang-reze bol uThe pas-e-risalat ke liye

baKHsh din mere nabi ne beTiyon ko 'azmaten

ya'ni jism-e-mustafa bhi hai tilawat ke liye

dosto gaoge kab tak zulf aur chehre ke git

waqf kar do zindagi aaqa ki midhat ke liye

sochta hun main bhi kafir hota ya mushrik 'zaki'

jo mere aaqa nahin aate hidayat ke liye