aaya hai yun shabab nasim-e-bahaar par

aayā hai yuuñ shabāb nasīm-e-bahār par

sabza lahak rahā hai sar-e-kohsār par

uTThīñ ghaTā.eñ jhuum ke rahmat baras ga.ī

hiire jaḌe hue haiñ har ik lāla-zār par

har chāk-e-dil rafū huā jaatā hai ḳhud-baḳhud

kis kī nazar paḌī hai garebāñ ke taar par

aisā faqīr jis pe amīrī ko naaz hai

sar ko paTak rahī hai dar-e-zī-vaqār par

chāheñ to ek pal meñ ḳhudā.ī 'atā kareñ

un kā to iḳhtiyār hai lail-o-nahār par

sajde karūñ nazar se jo mil jaa.e āstāñ

pahuñchūñ kisī tarah se dar-e-tājdār par

hai mad.h-ḳhvāñ nabī kī ye mā'lūm jab huā

paḌhne darūd aa.e farishte mazār par

sīkhā hai maiñ ne jān-e-payambar se ye shu'ūr

hairat hai kis liye mire sabr-o-qarār par

kāñdhoñ pe jab biThāyā to hañste hue chale

nāzāñ haiñ ḳhud nabī bhī navāsoñ ke pyaar par

jā.ūñ agar madīne to bar aa.e mudda'ā

sadqe hazār jaan se shah ke dayār par

maulā ab aap se hai 'vasiyya' kī iltijā

ho jaa.e ik karam kī nazar ḳhāksār par

aaya hai yun shabab nasim-e-bahaar par

sabza lahak raha hai sar-e-kohsar par

uTThin ghaTaen jhum ke rahmat baras gai

hire jaDe hue hain har ek lala-zar par

har chaak-e-dil rafu hua jata hai KHud-baKHud

kis ki nazar paDi hai gareban ke tar par

aisa faqir jis pe amiri ko naz hai

sar ko paTak rahi hai dar-e-zi-waqar par

chahen to ek pal mein KHudai 'ata karen

un ka to iKHtiyar hai lail-o-nahaar par

sajde karun nazar se jo mil jae aastan

pahunchun kisi tarah se dar-e-tajdar par

hai madh-KHwan nabi ki ye ma'lum jab hua

paDhne darud aae farishte mazar par

sikha hai main ne jaan-e-payambar se ye shu'ur

hairat hai kis liye mere sabr-o-qarar par

kandhon pe jab biThaya to hanste hue chale

nazan hain KHud nabi bhi nawason ke pyar par

jaun agar madine to bar aae mudda'a

sadqe hazar jaan se shah ke dayar par

maula ab aap se hai 'wasiyya' ki iltija

ho jae ek karam ki nazar KHaksar par