barish-e-nur sar-e-arz-o-sama dekhi hai

bārish-e-nūr sar-e-arz-o-samā dekhī hai

har jagah ism-e-mohammad kī ziyā dekhī hai

zikr-e-sarkār-e-do-'ālam jo zabāñ par aayā

ham ne mahkī huī mahfil kī fazā dekhī hai

jab pukārā hai to mahsūs kiyā aur bhī qurb

be-pukāre bhī magar un kī 'atā dekhī hai

jab bhī qur.āñ kī tilāvat meñ vo naam aayā hai

paikar-e-harf meñ tanvīr-e-ḳhudā dekhī hai

har sahar sajda meñ thī gumbad-e-ḳhazrā ke qarīb

ham ne ik aisī sahar salle-'alā dekhī hai

ham vahāñ pahuñche jo sauġhāt darūdoñ kī liye

lau charāġhoñ kī sar-e-dosh-e-havā dekhī hai

zehn khultā hī nahīñ un ke tasavvur ke baġhair

un ko sochā hai to phir fikr-e-rasā dekhī hai

raushnī jaise añdheroñ ko chhupā letī hai

yuuñ ḳhatā-poshī-e-arbāb-e-ḳhatā dekhī hai

ham 'sirāj' un kī lagan se haiñ munavvar varna

lau charāġhoñ kī bhaḌakte ba-ḳhudā dekhī hai

barish-e-nur sar-e-arz-o-sama dekhi hai

har jagah ism-e-mohammad ki ziya dekhi hai

zikr-e-sarkar-e-do-'alam jo zaban par aaya

hum ne mahki hui mahfil ki faza dekhi hai

jab pukara hai to mahsus kiya aur bhi qurb

be-pukare bhi magar un ki 'ata dekhi hai

jab bhi quran ki tilawat mein wo nam aaya hai

paikar-e-harf mein tanwir-e-KHuda dekhi hai

har sahar sajda mein thi gumbad-e-KHazra ke qarib

hum ne ek aisi sahar salle-'ala dekhi hai

hum wahan pahunche jo saughat darudon ki liye

lau charaghon ki sar-e-dosh-e-hawa dekhi hai

zehn khulta hi nahin un ke tasawwur ke baghair

un ko socha hai to phir fikr-e-rasa dekhi hai

raushni jaise andheron ko chhupa leti hai

yun KHata-poshi-e-arbab-e-KHata dekhi hai

hum 'siraj' un ki lagan se hain munawwar warna

lau charaghon ki bhaDakte ba-KHuda dekhi hai