darguzar hai jis ka shewa aur ho gham-KHwar bhi

dar-guzar hai jiskā sheva aur ho ġham-ḳhvār bhī

rahmat-e-haq bhī hai us par rahmat-e-sarkār bhī

dekh kar shaidā hue sab yaar bhī aġhyār bhī

aap kī guftār bhī aur aap kā kirdār bhī

marhabā sad-marhabā sad-marhabā sarkār haiñ

rahmatul-lil'ālamīñ bhī ahmad-e-muḳhtār bhī

kaam aa.ī hai nabī ke diin kī tablīġh meñ

maslahat bhī darguzar bhī sulh bhī paikār bhī

rah-ravān-e-rāh-e-haq ke sāmne nākām haiñ

āñdhiyāñ bhī bijliyāñ bhī mauj bhī mañjdhār bhī

ḳhāndān-e-mustafā meñ ek se baḌh kar hai ek

bā-vafā bhī pārsā bhī dost bhī ḳhud.dār bhī

jab nabī tashrīf laa.e to sahārā pā ga.e

ġham-zada bhī be-navā bhī past bhī nādār bhī

mo'jiza hai ek ishāra aap kī angusht kā

chāñd bhī TukḌe huā aur jhuk ga.e ashjār bhī

ik taraf hai rāh-e-āqā ik taraf duniyā kī raah

zindagī āsān bhī hai zindagī dushvār bhī

vo bhaTak sakte nahīñ hargiz ki jin ke rāhbar

un ke ahl-e-bait bhī haiñ aur un ke yaar bhī

naa't jab paḌhne lagā 'tanvīr' bazm-e-nā't meñ

dhaḌkanoñ kī ḳhud-ba-ḳhud baḌhne lagī raftār bhī

dar-guzar hai jiska shewa aur ho gham-KHwar bhi

rahmat-e-haq bhi hai us par rahmat-e-sarkar bhi

dekh kar shaida hue sab yar bhi aghyar bhi

aap ki guftar bhi aur aap ka kirdar bhi

marhaba sad-marhaba sad-marhaba sarkar hain

rahmatul-lil'alamin bhi ahmad-e-muKHtar bhi

kaam aai hai nabi ke din ki tabligh mein

maslahat bhi darguzar bhi sulh bhi paikar bhi

rah-rawan-e-rah-e-haq ke samne nakaam hain

aandhiyan bhi bijliyan bhi mauj bhi manjdhaar bhi

KHandan-e-mustafa mein ek se baDh kar hai ek

ba-wafa bhi parsa bhi dost bhi KHuddar bhi

jab nabi tashrif lae to sahaara pa gae

gham-zada bhi be-nawa bhi past bhi nadar bhi

mo'jiza hai ek ishaara aap ki angusht ka

chand bhi TukDe hua aur jhuk gae ashjar bhi

ek taraf hai rah-e-aqa ek taraf duniya ki rah

zindagi aasan bhi hai zindagi dushwar bhi

wo bhaTak sakte nahin hargiz ki jin ke rahbar

un ke ahl-e-bait bhi hain aur un ke yar bhi

na't jab paDhne laga 'tanwir' bazm-e-na't mein

dhaDkanon ki KHud-ba-KHud baDhne lagi raftar bhi