hamari bahs hai be-kar jaante hain huzur

hamārī bahs hai bekār jānte haiñ huzūr

hamāre 'ishq kā me'yār jānte haiñ huzūr

kabhī kiyā hī nahīñ dā'vā pārsā.ī kā

maiñ jāntā huuñ ki kirdār jānte haiñ huzūr

ḳhamosh baiThe haiñ rauze pe is liye ham bhī

hamāre saare sarokār jānte haiñ huzūr

mujhe yaqīñ hai vo itne qarīb haiñ mere

ki mere qalb kī raftār jānte haiñ huzūr

ḳhudā ke baa'd ḳhudā kī tamām duniyā meñ

ham aap hī ko madad-gār jānte haiñ huzūr

vo daf bajāte hue muntazir haiñ palkeñ bichhā.e

maqām aap kā ansār jānte haiñ huzūr

usī hisāb se karte haiñ us pe lutf-o-karam

hai kaun kitnā talabgār jānte haiñ huzūr

hai jis kī dostī zahrā ke ḳhānvāde se

usī ko apnā vafādār jānte haiñ huzūr

ab is se baḌh ke bhalā ‘ilm-e-ġhaib kyā hogā

ki rab kī zaat ke asrār jānte haiñ huzūr

ḳhayāl rakhiyegā 'tanvīr' naa't likhte hue

tumhārā jazba-e-iz.hār jānte haiñ huzūr

hamari bahs hai bekar jaante hain huzur

hamare 'ishq ka me'yar jaante hain huzur

kabhi kiya hi nahin da'wa parsai ka

main jaanta hun ki kirdar jaante hain huzur

KHamosh baiThe hain rauze pe is liye hum bhi

hamare sare sarokar jaante hain huzur

mujhe yaqin hai wo itne qarib hain mere

ki mere qalb ki raftar jaante hain huzur

KHuda ke ba'd KHuda ki tamam duniya mein

hum aap hi ko madad-gar jaante hain huzur

wo daf bajate hue muntazir hain palken bichhae

maqam aap ka ansar jaante hain huzur

usi hisab se karte hain us pe lutf-o-karam

hai kaun kitna talabgar jaante hain huzur

hai jis ki dosti zahra ke KHanwade se

usi ko apna wafadar jaante hain huzur

ab is se baDh ke bhala ‘ilm-e-ghaib kya hoga

ki rab ki zat ke asrar jaante hain huzur

KHayal rakhiyega 'tanwir' na't likhte hue

tumhaara jazba-e-izhaar jaante hain huzur