jari hai faiz-e-‘am risalat-maab ka

jaarī hai faiz-e-‘ām risālat-ma.āb kā

saa.il hai shād-kām risālat-ma.āb kā

āshuftagī kahīñ hai na āzurdagī kahīñ

allāh re nizām risālat-ma.āb kā

tāb-e-nazar kahūñ ki ziyā-e-tajalliyāt

āñkhoñ meñ hai qiyām risālat-ma.āb kā

har shai mohammadī hai jahān-e-hayāt kī

DhūñDūñ kahāñ maqām risālat-ma.āb kā

sajde meñ gir ga.e haiñ zamāne ke falsafī

jis dam sunā kalām risālat-ma.āb kā

sūraj se iltifāt ke mushkil pighal ga.ī

maiñ ne liyā jo naam risālat-ma.āb kā

rozīna mil rahā hai ye mujh ko huzūr se

piitā huuñ roz jaam risālat-ma.āb kā

nāpāk zehn bhī haiñ mire paak mulk meñ

nāfiz ho kyā nizām risālat-ma.āb kā

apnā libās hai na vo apnī zabān hai

chubhtā hai ehtimām risālat-ma.āb kā

mil kar uThāo parcham-e-ahrār-o-ahl-e-dīñ

aaya hai ye payām risālat-ma.āb kā

sa’ī-o-amal ke shahr kā darvāza kholiye

baaqī abhī hai kaam risālat-ma.āb kā

ek ek harf-e-nā’t adab kā hai shāhkār

sochoñ meñ hai ḳhirām risālat-ma.āb kā

is kā bhī haq hai gulshan-e-haq kī bahār par

'zauqī' bhī hai ġhulām risālat-ma.āb kā

jari hai faiz-e-‘am risalat-maab ka

sail hai shad-kaam risalat-maab ka

aashuftagi kahin hai na aazurdagi kahin

allah re nizam risalat-maab ka

tab-e-nazar kahun ki ziya-e-tajalliyat

aankhon mein hai qiyam risalat-maab ka

har shai mohammadi hai jahan-e-hayat ki

DhunDun kahan maqam risalat-maab ka

sajde mein gir gae hain zamane ke falsafi

jis dam suna kalam risalat-maab ka

suraj se iltifat ke mushkil pighal gai

main ne liya jo nam risalat-maab ka

rozina mil raha hai ye mujh ko huzur se

pita hun roz jam risalat-maab ka

napak zehn bhi hain mere pak mulk mein

nafiz ho kya nizam risalat-maab ka

apna libas hai na wo apni zaban hai

chubhta hai ehtimam risalat-maab ka

mil kar uThao parcham-e-ahrar-o-ahl-e-din

aaya hai ye payam risalat-maab ka

sa’i-o-amal ke shahr ka darwaza kholiye

baqi abhi hai kaam risalat-maab ka

ek ek harf-e-na’t adab ka hai shahkar

sochon mein hai KHiram risalat-maab ka

is ka bhi haq hai gulshan-e-haq ki bahaar par

'zauqi' bhi hai ghulam risalat-maab ka