jis pe paD jaegi un ke chehra-e-anwar ki dhup

jis pe paḌ jā.egī un ke chehra-e-anvar kī dhuup

us ko kyā jhulsā.egī phir ḳhāvar-e-mahshar kī dhuup

zindagī jab bhī guzartī hai ḳhizāñ ke daur se

sabz kar detī hai mujh ko rauza-e-at.har kī dhuup

jis kī ThanDak aaj bhī mahsūs kartā hai ye dil

kis qadar thī farhat-afzā shahr-e-paiġhambar kī dhuup

gumbad-e-ḳhazrā pe rauzan is liye rakkhā gayā

dekh kar andar kī rangat khil uThe bāhar kī dhuup

yā-ilāhī mujh ko bhī pahuñchā de us darbār tak

zulmatoñ ko 'nūr' kar detī hai jis ke dar kī dhuup

DhūñDtī phirtī hai un kā sāya-e-be-sā.egī

sar chhupāne ko thakī-hārī huī din bhar kī dhuup

jis pe paD jaegi un ke chehra-e-anwar ki dhup

us ko kya jhulsaegi phir KHawar-e-mahshar ki dhup

zindagi jab bhi guzarti hai KHizan ke daur se

sabz kar deti hai mujh ko rauza-e-athar ki dhup

jis ki ThanDak aaj bhi mahsus karta hai ye dil

kis qadar thi farhat-afza shahr-e-paighambar ki dhup

gumbad-e-KHazra pe rauzan is liye rakkha gaya

dekh kar andar ki rangat khil uThe bahar ki dhup

ya-ilahi mujh ko bhi pahuncha de us darbar tak

zulmaton ko 'nur' kar deti hai jis ke dar ki dhup

DhunDti phirti hai un ka saya-e-be-saegi

sar chhupane ko thaki-haari hui din bhar ki dhup