makke ki baat kar tu madine ki baat kar

makke kī baat kar tū madīne kī baat kar

zāhid kabhī to mujh se qarīne kī baat kar

duniyā ke sīm-o-zar na ḳhazīne kī baat kar

un kī navāzishoñ ke dafīne kī baat kar

sadqe meñ jis ke phuul mahakte haiñ baaġh meñ

mauj-e-nasīm un ke pasīne kī baat kar

vā'iz bayān ho chukā machhlī ke peT kā

ġhār-e-hirā ke qalb kī siine kī baat kar

'īdain kā siyām kā haj kā mahīna hai

jin ke sabab hai un ke mahīne kī baat kar

ab chhoḌ apne bām-e-taraqqī kī dāstāñ

ai zindagī tū 'arsh ke ziine kī baat kar

saaqī ho jin se gumbad-e-ḳhazrā kā in'ikās

un manzaroñ meñ Duub ke piine kī baat kar

jaanā hai tujh ko ḳhuld magar mujh se nāḳhudā

taiba ko jaane vaale safīne kī baat kar

angushtarī-e-dil pe na jā mere ham-nashīñ

angushtarī-e-dil ke nagīne kī baat kar

hamd-e-ḳhudā-o-sayyad-e-'ālam kī naa't likh

'aḳhtar' pas-e-hayāt bhī jiine kī baat kar

makke ki baat kar tu madine ki baat kar

zahid kabhi to mujh se qarine ki baat kar

duniya ke sim-o-zar na KHazine ki baat kar

un ki nawazishon ke dafine ki baat kar

sadqe mein jis ke phul mahakte hain bagh mein

mauj-e-nasim un ke pasine ki baat kar

wa'iz bayan ho chuka machhli ke peT ka

ghaar-e-hira ke qalb ki sine ki baat kar

'idain ka siyam ka haj ka mahina hai

jin ke sabab hai un ke mahine ki baat kar

ab chhoD apne baam-e-taraqqi ki dastan

ai zindagi tu 'arsh ke zine ki baat kar

saqi ho jin se gumbad-e-KHazra ka in'ikas

un manzaron mein Dub ke pine ki baat kar

jaana hai tujh ko KHuld magar mujh se naKHuda

taiba ko jaane wale safine ki baat kar

angushtari-e-dil pe na ja mere ham-nashin

angushtari-e-dil ke nagine ki baat kar

hamd-e-KHuda-o-sayyad-e-'alam ki na't likh

'aKHtar' pas-e-hayat bhi jine ki baat kar