nam ke naqsh se raushan ye nagina ho jae

naam ke naqsh se raushan ye nagīna ho jaa.e

ka.aba-e-dil mire allāh madīna ho jaa.e

vo chamak dard kī ho dil meñ ki bijlī chamke

dāman-e-tūr zarā aaj ye siina ho jaa.e

tū jo chāhe are o mujh ko bachāne vaale

mauj-e-tūfān-e-balā uTh ke safīna ho jaa.e

zulmat-e-kufr se baḌh kar hai siyāhī dil kī

duur kyūñkar dil-e-aġhyār se kiina ho jaa.e

aañkh meñ barq-e-sar-e-tūr ho gumbad kā kalas

sharaf-andoz-e-ziyārat ye kamīna ho jaa.e

dil rahe haath meñ tere mire pahlū ke evaz

chāhtā huuñ mirī ḳhātam kā nagīna ho jaa.e

us kī taqdīr jo pāmāl ho tere dar par

us kī taqdīr ki jo ḳhāk-e-madīna ho jaa.e

dafn hoñ saath tire mere guhar-hā-e-suḳhan

ḳhaak meñ mil ke numāyāñ ye dafīna ho jaa.e

jaan kī tarah tamanna hai yahī dil meñ 'riyāz'

marūñ ka.abe meñ to muñh sū-e-madīna ho jaa.e

nam ke naqsh se raushan ye nagina ho jae

kaba-e-dil mere allah madina ho jae

wo chamak dard ki ho dil mein ki bijli chamke

daman-e-tur zara aaj ye sina ho jae

tu jo chahe are o mujh ko bachane wale

mauj-e-tufan-e-bala uTh ke safina ho jae

zulmat-e-kufr se baDh kar hai siyahi dil ki

dur kyunkar dil-e-aghyar se kina ho jae

aankh mein barq-e-sar-e-tur ho gumbad ka kalas

sharaf-andoz-e-ziyarat ye kamina ho jae

dil rahe hath mein tere mere pahlu ke ewaz

chahta hun meri KHatam ka nagina ho jae

us ki taqdir jo pamal ho tere dar par

us ki taqdir ki jo KHak-e-madina ho jae

dafn hon sath tere mere guhar-ha-e-suKHan

KHak mein mil ke numayan ye dafina ho jae

jaan ki tarah tamanna hai yahi dil mein 'riyaz'

marun kabe mein to munh su-e-madina ho jae