nau-e-insan ki hidayat ke liye aae rasul

nau'-e-insāñ kī hidāyat ke liye aa.e rasūl

zindagī kā ik zābta laa.e rasūl

khul ga.e āñkhoñ pe asrār-e-hayāt-o-kā.enāt

zehn-o-dil ko kar ga.e raushan suḳhan-hā-e-rasūl

ban ga.ī gahvāra-e-amn-o-amāñ ye zindagī

aap ke andāz jab duniyā ne apnā.e rasūl

mausamoñ ke saath un ke phuul bhī murjhā ga.e

inqilāb-e-vaqt par hañste haiñ gul-hā.e-rasūl

muntashir phir ho gayā insāniyat kā qāfila

DhūñD kar phir lā.iye naqsh-e-kaf-e-pā-e-rasūl

us se baḌh kar kaun hogā kāmyāb-e-zindagī

jis se ḳhush ho jaa.e aaqā jis ko mil jaa.e rasūl

ham meñ phir tafrīq kaisī ajnabiyyat kis liye

maiñ bhī shaidā-e-mohammad tū bhī shaidā-e-rasūl

dil vahī dil hai jo us ke ġham kā mahram ho 'azīz'

sar vahī sar hai bharā ho jis meñ saudā-e-rasūl

nau'-e-insan ki hidayat ke liye aae rasul

zindagi ka ek zabta lae rasul

khul gae aankhon pe asrar-e-hayat-o-kaenat

zehn-o-dil ko kar gae raushan suKHan-ha-e-rasul

ban gai gahwara-e-amn-o-aman ye zindagi

aap ke andaz jab duniya ne apnae rasul

mausamon ke sath un ke phul bhi murjha gae

inqilab-e-waqt par hanste hain gul-hae-rasul

muntashir phir ho gaya insaniyat ka qafila

DhunD kar phir laiye naqsh-e-kaf-e-pa-e-rasul

us se baDh kar kaun hoga kaamyab-e-zindagi

jis se KHush ho jae aaqa jis ko mil jae rasul

hum mein phir tafriq kaisi ajnabiyyat kis liye

main bhi shaida-e-mohammad tu bhi shaida-e-rasul

dil wahi dil hai jo us ke gham ka mahram ho 'aziz'

sar wahi sar hai bhara ho jis mein sauda-e-rasul