qayamat tak rahe gardish mein paimana mohammad ka

qayāmat tak rahe gardish meñ paimāna mohammad kā

'ajab mai-ḳhāna hai yā-rab ye mai-ḳhāna mohammad kā

na thaktā hai vafāoñ se na Dartā hai jafāoñ se

mazāq-e-‘ām se 'āshiq hai begāna mohammad kā

ulaT diiñ jis ne dam bhar meñ safeñ īrān-o-rūmā kī

kabhī aisā bhī thā ek ek dīvāna mohammad kā

kahāñ vo tuur kā jalva kahāñ me'rāj kā 'ālam

visāl-e-dost thā sab se judāgāna mohammad kā

jahāñ kī sar-bulandī do-jahāñ kī arjumandī hai

basīrat ho to samjho kyā hai yārāna mohammad kā

mirā dil tūr-e-sīnā hai nigāheñ merī muusā haiñ

in āñkhoñ meñ hai jab se husn-e-jānāna mohammad kā

abū-bakr-o-'umar ‘usmān-o-haidar se koī pūchhe

ki thā kis kaif se labrez paimāna mohammad kā

ham-āġhosh-e-jamāl-e-shāhid-e-mā'nā haiñ jo āñkheñ

'ayāñ un par hai husn-e-be-hijābāna mohammad kā

ḳhushā-qismat ġham-e-kaunain se fursat milī 'mahvī'

huā jab dil asīr-e-gesū-o-shāna mohammad kā

qayamat tak rahe gardish mein paimana mohammad ka

'ajab mai-KHana hai ya-rab ye mai-KHana mohammad ka

na thakta hai wafaon se na Darta hai jafaon se

mazaq-e-‘am se 'ashiq hai begana mohammad ka

ulaT din jis ne dam bhar mein safen iran-o-ruma ki

kabhi aisa bhi tha ek ek diwana mohammad ka

kahan wo tur ka jalwa kahan me'raj ka 'alam

visal-e-dost tha sab se judagana mohammad ka

jahan ki sar-bulandi do-jahan ki arjumandi hai

basirat ho to samjho kya hai yarana mohammad ka

mera dil tur-e-sina hai nigahen meri musa hain

in aankhon mein hai jab se husn-e-jaanana mohammad ka

abu-bakr-o-'umar ‘usman-o-haidar se koi puchhe

ki tha kis kaif se labrez paimana mohammad ka

ham-aghosh-e-jamal-e-shahid-e-ma'na hain jo aankhen

'ayan un par hai husn-e-be-hijabana mohammad ka

KHusha-qismat gham-e-kaunain se fursat mili 'mahwi'

hua jab dil asir-e-gesu-o-shana mohammad ka