quran-e-mubin surat-e-sultan-e-madina

qur.ān-e-mubīñ sūrat-e-sultān-e-madīna

farmān-e-matīñ hujjat-e-sultān-e-madīna

jab 'ishq ne kī bai'at-e-sultān-e-madīna

jazboñ meñ basī ġhāyat-e-sultān-e-madīna

iqrā kī sahar nūr-e-hudā shams-e-risālat

tanvīr-e-hirā hazrat-e-sultān-e-madīna

jalve haiñ sar-e-'arsh-e-barīñ ye to ḳhabar hai

mā'lūm nahīñ rif'at-e-sultān-e-madīna

gulzār-e-sharī'at kā agar phuul hai to bhī

sāñsoñ meñ basā nik.hat-e-sultān-e-madīna

dushman ko bhī dete haiñ 'ināyāt ke tohfe

lā-raib hai ye 'azmat-e-sultān-e-madīna

aflāk bhī jhukte haiñ madīne kī zamīñ par

allāh re ye satvat-e-sultān-e-madīna

hotā hai vahī saltanat-e-vaqt kā vāris

mil jaa.e jise qurbat-e-sultān-e-madīna

is firqa-parastī ke ta'assub ko miTā de

jiinā hai agar ummat-e-sultān-e-madīna

us haath pe ho jaao sabhī mil ke nichhāvar

jis haath meñ ho rāyat-e-sultān-e-madīna

maddāh-e-risālat huuñ sar-e-'arsa-e-mahshar

DhūñDegī mujhe rahmat-e-sultān-e-madīna

jab fikr meñ ghul jaatā hai yādoñ kā taqaddus

kartā huuñ raqam mid.hat-e-sultān-e-madīna

ashkoñ meñ na bah jaa.e kahīñ qalb-e-hazīñ bhī

itnā na satā furqat-e-sultān-e-madīna

mujh se hai mashiyyat kā bharam dahr meñ 'zauqī'

ġhairat hai mirī ġhairat-e-sultān-e-madīna

quran-e-mubin surat-e-sultan-e-madina

farman-e-matin hujjat-e-sultan-e-madina

jab 'ishq ne ki bai'at-e-sultan-e-madina

jazbon mein basi ghayat-e-sultan-e-madina

iqra ki sahar nur-e-huda shams-e-risalat

tanwir-e-hira hazrat-e-sultan-e-madina

jalwe hain sar-e-'arsh-e-barin ye to KHabar hai

ma'lum nahin rif'at-e-sultan-e-madina

gulzar-e-shari'at ka agar phul hai to bhi

sanson mein basa nikhat-e-sultan-e-madina

dushman ko bhi dete hain 'inayat ke tohfe

la-raib hai ye 'azmat-e-sultan-e-madina

aflak bhi jhukte hain madine ki zamin par

allah re ye satwat-e-sultan-e-madina

hota hai wahi saltanat-e-waqt ka waris

mil jae jise qurbat-e-sultan-e-madina

is firqa-parasti ke ta'assub ko miTa de

jina hai agar ummat-e-sultan-e-madina

us hath pe ho jao sabhi mil ke nichhawar

jis hath mein ho rayat-e-sultan-e-madina

maddah-e-risalat hun sar-e-'arsa-e-mahshar

DhunDegi mujhe rahmat-e-sultan-e-madina

jab fikr mein ghul jata hai yaadon ka taqaddus

karta hun raqam midhat-e-sultan-e-madina

ashkon mein na bah jae kahin qalb-e-hazin bhi

itna na sata furqat-e-sultan-e-madina

mujh se hai mashiyyat ka bharam dahr mein 'zauqi'

ghairat hai meri ghairat-e-sultan-e-madina