قرآن مبیں صورت سلطان مدینہ

قرآن مبیں صورت سلطان مدینہ

فرمان متیں حجت سلطان مدینہ

جب عشق نے کی بیعت سلطان مدینہ

جذبوں میں بسی غایت سلطان مدینہ

اقرا کی سحر نور ہدیٰ شمس رسالت

تنویر حرا حضرت سلطان مدینہ

جلوے ہیں سر عرش بریں یہ تو خبر ہے

معلوم نہیں رفعت سلطان مدینہ

گلزار شریعت کا اگر پھول ہے تو بھی

سانسوں میں بسا نکہت سلطان مدینہ

دشمن کو بھی دیتے ہیں عنایات کے تحفے

لا ریب ہے یہ عظمت سلطان مدینہ

افلاک بھی جھکتے ہیں مدینے کی زمیں پر

اللہ رے یہ سطوت سلطان مدینہ

ہوتا ہے وہی سلطنت وقت کا وارث

مل جائے جسے قربت سلطان مدینہ

اس فرقہ پرستی کے تعصب کو مٹا دے

جینا ہے اگر امت سلطان مدینہ

اس ہاتھ پہ ہو جاؤ سبھی مل کے نچھاور

جس ہاتھ میں ہو رایت سلطان مدینہ

مداح رسالت ہوں سر عرصۂ محشر

ڈھونڈے گی مجھے رحمت سلطان مدینہ

جب فکر میں گھل جاتا ہے یادوں کا تقدس

کرتا ہوں رقم مدحت سلطان مدینہ

اشکوں میں نہ بہہ جائے کہیں قلب حزیں بھی

اتنا نہ ستا فرقت سلطان مدینہ

مجھ سے ہے مشیت کا بھرم دہر میں ذوقیؔ

غیرت ہے مری غیرت سلطان مدینہ