sari sadiyon pe jo bhaari hai wo lamha milta

saarī sadiyoñ pe jo bhārī hai vo lamha miltā

kaash sarkār-e-do-'ālam kā zamāna miltā

aap ko dekhtā makke se maiñ hijrat karte

aap kā naqsh-e-qadam aap kā rasta miltā

aap ko dekhtā taa.ef meñ du'ā.eñ dete

yuuñ mire sabr-o-tahammul ko salīqa miltā

aap ke sāmne rakh detā maiñ sab kuchh lā kar

nusrat-e-dīñ ke liye jab bhī ishāra miltā

apnā ghar-bār luTā detā to us ke badle

hubb-e-sarkār-e-madīna kā ḳhazāna miltā

aap ke pīchhe khaḌe ho ke namāzeñ paḌhtā

aap ke qadmoñ ke pīchhe mujhe sajda miltā

bhuul jaatā maiñ kisī taaq meñ āñkheñ rakh kar

aap ko dekhte rahne kā bahāna miltā

aap kī tarh biThātā maiñ use shānoñ par

raah meñ aap kā jab koī navāsā miltā

hashr tak merī ġhulāmī yuuñ hī qaa.em rahtī

merī har nasl ko 'faḳhrī' yahī virsa miltā

sari sadiyon pe jo bhaari hai wo lamha milta

kash sarkar-e-do-'alam ka zamana milta

aap ko dekhta makke se main hijrat karte

aap ka naqsh-e-qadam aap ka rasta milta

aap ko dekhta taef mein du'aen dete

yun mere sabr-o-tahammul ko saliqa milta

aap ke samne rakh deta main sab kuchh la kar

nusrat-e-din ke liye jab bhi ishaara milta

apna ghar-bar luTa deta to us ke badle

hubb-e-sarkar-e-madina ka KHazana milta

aap ke pichhe khaDe ho ke namazen paDhta

aap ke qadmon ke pichhe mujhe sajda milta

bhul jata main kisi taq mein aankhen rakh kar

aap ko dekhte rahne ka bahana milta

aap ki tarh biThata main use shanon par

rah mein aap ka jab koi nawasa milta

hashr tak meri ghulami yun hi qaem rahti

meri har nasl ko 'faKHri' yahi wirsa milta