sab mahw-e-KHwab tu hai haqiqat tujhe salam

sab mahv-e-ḳhvāb tū hai haqīqat tujhe salām

to ne.amat-e-tamām to barakat tujhe salām

terā vajūd hāsil-e-ummat tujhe salām

kartī hai ab to apnī mohabbat tujhe salām

ai mere mehr-o-māh-e-nubuvvat tujhe salām

insāniyat ke ġham meñ tirī chashm tar-ba-tar

bādal ho jaise koī liye bārish guhar

be-barg zindagī ko diyā āb-e-mo'atabar

tujh se milī hayāt ko nuz.hat tujhe salām

ai mere mehr-o-māh-e-nubuvvat tujhe salām

merā qalam javān huā tere zikr se

pastī se āsmān huā tere zikr se

ā.īna ik jahān huā tere zikr se

zor-e-bayāñ hai tujh se salāmat tujhe salām

ai mere mehr-o-māh-e-nubuvvat tujhe salām

baaqī hai tere dam se bharam tere ishq kā

oḌhe hue libāda haiñ ham tere ishq kā

samjheñ ise bhī kyoñ na karam tere ishq kā

kartā huuñ maiñ bhī na.at kī jur.at tujhe salām

ai mere mehr-o-māh-e-nubuvvat tujhe salām

tū hai sarāpā ishq-o-mohabbat kā tarjumāñ

terī har ek baat hai ulfat kī dāstāñ

tujh par nisār ho ke le umr-e-jāvedāñ

tū hai charāġh-e-ḳhāna-e-zulmat tujhe salām

ai mere mehr-o-māh-e-nubuvvat tujhe salām

ḳhairul-anām, rahmat-e-ālam laqab tirā

phir sānī-o-nazīr koī hogā kab tirā

guzrā ḳhudā kī yaad meñ mahbūb-e-rab tirā

ḳhatmur-rusul ba-kār-e-sharī.at tujhe salām

ai mere mehr-o-māh-e-nubuvvat tujhe salām

qur.ān ḳhud hai terī risālat pe ik dalīl

jis ko hirā ke ġhaar meñ laa.e the jibra.īl

mumkin nahīñ hai jis ke liye koī qāl-o-qīl

tū hāmil-e-kitāb-e-risālat tujhe salām

ai mere mehr-o-māh-e-nubuvvat tujhe salām

tū mahfiloñ kī jaan hai tū rūh-e-anjuman

tū sham-e-bazm-e-dil bhī hai tū nūr-e-fikr-o-fan

to raushnī-e-zehn hai tū sāya-e-badan

merī ye na.at terī badaulat tujhe salām

ai mere mehr-o-māh-e-nubuvvat tujhe salām

sab mahw-e-KHwab tu hai haqiqat tujhe salam

to neamat-e-tamam to barakat tujhe salam

tera wajud hasil-e-ummat tujhe salam

karti hai ab to apni mohabbat tujhe salam

ai mere mehr-o-mah-e-nubuwwat tujhe salam

insaniyat ke gham mein teri chashm tar-ba-tar

baadal ho jaise koi liye barish guhar

be-barg zindagi ko diya aab-e-mo'atabar

tujh se mili hayat ko nuzhat tujhe salam

ai mere mehr-o-mah-e-nubuwwat tujhe salam

mera qalam jawan hua tere zikr se

pasti se aasman hua tere zikr se

aaina ek jahan hua tere zikr se

zor-e-bayan hai tujh se salamat tujhe salam

ai mere mehr-o-mah-e-nubuwwat tujhe salam

baqi hai tere dam se bharam tere ishq ka

oDhe hue libaada hain hum tere ishq ka

samjhen ise bhi kyon na karam tere ishq ka

karta hun main bhi nat ki jurat tujhe salam

ai mere mehr-o-mah-e-nubuwwat tujhe salam

tu hai sarapa ishq-o-mohabbat ka tarjuman

teri har ek baat hai ulfat ki dastan

tujh par nisar ho ke le umr-e-jawedan

tu hai charagh-e-KHana-e-zulmat tujhe salam

ai mere mehr-o-mah-e-nubuwwat tujhe salam

KHairul-anam, rahmat-e-alam laqab tera

phir sani-o-nazir koi hoga kab tera

guzra KHuda ki yaad mein mahbub-e-rab tera

KHatmur-rusul ba-kar-e-shariat tujhe salam

ai mere mehr-o-mah-e-nubuwwat tujhe salam

quran KHud hai teri risalat pe ek dalil

jis ko hira ke ghaar mein lae the jibrail

mumkin nahin hai jis ke liye koi qal-o-qil

tu hamil-e-kitab-e-risalat tujhe salam

ai mere mehr-o-mah-e-nubuwwat tujhe salam

tu mahfilon ki jaan hai tu ruh-e-anjuman

tu sham-e-bazm-e-dil bhi hai tu nur-e-fikr-o-fan

to raushni-e-zehn hai tu saya-e-badan

meri ye nat teri badaulat tujhe salam

ai mere mehr-o-mah-e-nubuwwat tujhe salam