سب محو خواب تو ہے حقیقت تجھے سلام

سب محو خواب تو ہے حقیقت تجھے سلام

تو نعمت تمام تو برکت تجھے سلام

تیرا وجود حاصل امت تجھے سلام

کرتی ہے اب تو اپنی محبت تجھے سلام

اے میرے مہر و ماہ نبوت تجھے سلام

انسانیت کے غم میں تری چشم تر بہ تر

بادل ہو جیسے کوئی لئے بارش گہر

بے برگ زندگی کو دیا آب معتبر

تجھ سے ملی حیات کو نزہت تجھے سلام

اے میرے مہر و ماہ نبوت تجھے سلام

میرا قلم جوان ہوا تیرے ذکر سے

پستی سے آسمان ہوا تیرے ذکر سے

آئینہ اک جہان ہوا تیرے ذکر سے

زور بیاں ہے تجھ سے سلامت تجھے سلام

اے میرے مہر و ماہ نبوت تجھے سلام

باقی ہے تیرے دم سے بھرم تیرے عشق کا

اوڑھے ہوئے لبادہ ہیں ہم تیرے عشق کا

سمجھیں اسے بھی کیوں نہ کرم تیرے عشق کا

کرتا ہوں میں بھی نعت کی جرأت تجھے سلام

اے میرے مہر و ماہ نبوت تجھے سلام

تو ہے سراپا عشق و محبت کا ترجماں

تیری ہر ایک بات ہے الفت کی داستاں

تجھ پر نثار ہو کے ملے عمر جاوداں

تو ہے چراغ خانۂ ظلمت تجھے سلام

اے میرے مہر و ماہ نبوت تجھے سلام

خیرالانام، رحمت عالم لقب ترا

پھر ثانی و نظیر کوئی ہوگا کب ترا

گزرا خدا کی یاد میں محبوب رب ترا

ختم الرسل بہ کار شریعت تجھے سلام

اے میرے مہر و ماہ نبوت تجھے سلام

قرآن خود ہے تیری رسالت پہ اک دلیل

جس کو حرا کے غار میں لائے تھے جبرئیل

ممکن نہیں ہے جس کے لئے کوئی قال و قیل

تو حامل کتاب رسالت تجھے سلام

اے میرے مہر و ماہ نبوت تجھے سلام

تو محفلوں کی جان ہے تو روح انجمن

تو شمع بزم دل بھی ہے تو نور فکر و فن

تو روشنیٔ ذہن ہے تو سایۂ بدن

میری یہ نعت تیری بدولت تجھے سلام

اے میرے مہر و ماہ نبوت تجھے سلام