sarkar ke faiz-e-nisbat se masrur dikhai deta hai

sarkār ke faiz-e-nisbat se masrūr dikhā.ī detā hai

taiba kī galī kā har zarra pur-nūr dikhā.ī detā hai

vo nūr-e-azal vo husn-e-abad parde meñ bhī rah kar chhup na sakā

har shai se numāyāñ hai lekin mastūr dikhā.ī detā hai

bheḌoñ kā charāne vaalā hai jo 'arsh kā jaane vaalā hai

sultān-e-do-'ālam ho kar bhī mazdūr dikhā.ī detā hai

hotā hai bichhaḌne kā sadma naqsh-e-kaf-e-pā-e-āqā se

us dar se jo vāpas aatā hai ranjūr dikhā.ī detā hai

raushan hai dayār-e-kā'ba bhī nisbat se jamāl-e-āqā kī

har zarra 'aqīl' us kūche kā pur-nūr dikhā.ī detā hai

sarkar ke faiz-e-nisbat se masrur dikhai deta hai

taiba ki gali ka har zarra pur-nur dikhai deta hai

wo nur-e-azal wo husn-e-abad parde mein bhi rah kar chhup na saka

har shai se numayan hai lekin mastur dikhai deta hai

bheDon ka charane wala hai jo 'arsh ka jaane wala hai

sultan-e-do-'alam ho kar bhi mazdur dikhai deta hai

hota hai bichhaDne ka sadma naqsh-e-kaf-e-pa-e-aqa se

us dar se jo wapas aata hai ranjur dikhai deta hai

raushan hai dayar-e-ka'ba bhi nisbat se jamal-e-aqa ki

har zarra 'aqil' us kuche ka pur-nur dikhai deta hai