shamsuzzuha bhi aap hain badrudduja bhi aap

shamsuzzuhā bhī aap haiñ badruddujā bhī aap

ā.īna-e-shu'ūr ke ruḳh kī jilā bhī aap

dhūpoñ kī rahguzār meñ abr-e-karam bhī haiñ

bahr-e-fanā meñ sāhil-e-mauj-e-baqā bhī aap

qāsid bhī jazb-e-qasr bhī maqsad bhī aap haiñ

manzil bhī rāhbar bhī rah-e-kibriyā bhī aap

kyūñkar na shar-zadoñ ko mile aap se sukūñ

ḳhairul-bashar bhī aap haiñ ḳhair-ul-varā bhī aap

kyūñkar na farsh-o-‘arsh fazā.el raqam kareñ

sarḳhail-e-ambiyā haiñ habīb-e-ḳhudā bhī aap

larzāñ ho kyoñ na sho'bada-bāzoñ kā har fusūñ

īmāñ bhī haiñ yaqīñ bhī charāġh-e-hudā bhī aap

shāhid agar burāq hai rafraf bhī hai gavāh

me'rāj-e-rah-ravī kī rah-e-irtiqā bhī aap

sub.h-e-azal bhī shām-e-abad bhī hai aap se

kal ibtidā bhī aap the aaj intihā bhī aap

saarā zamāna rahmat-e-'ālam na kyoñ kahe

mehr-o-vafā bhī aap haiñ lutf-o-‘atā bhī aap

majbūr-o-be-navā kī tamanna bhī aap haiñ

mahsūr-e-jabr-o-qahr ke dil kī du'ā bhī aap

kashkol-e-ārzū ko javāhar se bhar diyā

maḳhzan bhī āñ-huzūr haiñ bāb-e-saḳhā bhī aap

'zauqī' ke 'ilm-o-fan kā taqaddus bhī aap haiñ

lauh-e-taḳhaiyyulāt pe harf-e-sanā bhī aap

shamsuzzuha bhi aap hain badrudduja bhi aap

aaina-e-shu'ur ke ruKH ki jila bhi aap

dhupon ki rahguzar mein abr-e-karam bhi hain

bahr-e-fana mein sahil-e-mauj-e-baqa bhi aap

qasid bhi jazb-e-qasr bhi maqsad bhi aap hain

manzil bhi rahbar bhi rah-e-kibriya bhi aap

kyunkar na shar-zadon ko mile aap se sukun

KHairul-bashar bhi aap hain KHair-ul-wara bhi aap

kyunkar na farsh-o-‘arsh fazael raqam karen

sarKHail-e-ambiya hain habib-e-KHuda bhi aap

larzan ho kyon na sho'bada-bazon ka har fusun

iman bhi hain yaqin bhi charagh-e-huda bhi aap

shahid agar buraq hai rafraf bhi hai gawah

me'raj-e-rah-rawi ki rah-e-irtiqa bhi aap

subh-e-azal bhi sham-e-abad bhi hai aap se

kal ibtida bhi aap the aaj intiha bhi aap

sara zamana rahmat-e-'alam na kyon kahe

mehr-o-wafa bhi aap hain lutf-o-‘ata bhi aap

majbur-o-be-nawa ki tamanna bhi aap hain

mahsur-e-jabr-o-qahr ke dil ki du'a bhi aap

kashkol-e-arzu ko jawahar se bhar diya

maKHzan bhi aan-huzur hain bab-e-saKHa bhi aap

'zauqi' ke 'ilm-o-fan ka taqaddus bhi aap hain

lauh-e-taKHaiyyulat pe harf-e-sana bhi aap