sunaun ham-nafas aa tujhko afsana mohammad ka

sunā.ūñ ham-nafas aa tujh ko afsāna mohammad kā

ki dil roz-e-azal hī se hai dīvāna mohammad kā

zamīñ masnad magar parvā na thī kisrā-o-qaisar kī

ta'ālallah ye thā faqr-e-shāhāna mohammad kā

yahāñ kī sarḳhushī par tuur kī be-hoshiyāñ sadqe

ye mai-ḳhāna hai ai muusā vo mai-ḳhāna mohammad kā

'arab kā zarra-zarra aaj tak sarshār-e-vahdat hai

kabhī gardish meñ aaya thā jo paimāna mohammad kā

palaT dī ik nazar meñ jis ne kaayā bazm-e-hastī kī

koī e'jāz thā yā 'azm-e-mardāna mohammad kā

nazar aa.e jo sham'-e-rauza-e-anvar in āñkhoñ ko

lapak kar nazr kar de jaan parvāna mohammad kā

na aañsū aañkh ke thamte na miTtī hai taḌap dil kī

sunā hai jab se in kānoñ ne afsāna mohammad kā

qasam khāte haiñ ahl-e-hosh jis ke 'aql-o-hikmat kī

ḳhudā shāhid vo farzāna hai dīvāna mohammad kā

nashāt-e-har-do-'ālam kā ise hāsil samajh 'mahvī'

'ajab sahbā se hai labrez paimāna mohammad kā

sunaun ham-nafas aa tujh ko afsana mohammad ka

ki dil roz-e-azal hi se hai diwana mohammad ka

zamin masnad magar parwa na thi kisra-o-qaisar ki

ta'alallah ye tha faqr-e-shahana mohammad ka

yahan ki sarKHushi par tur ki be-hoshiyan sadqe

ye mai-KHana hai ai musa wo mai-KHana mohammad ka

'arab ka zarra-zarra aaj tak sarshaar-e-wahdat hai

kabhi gardish mein aaya tha jo paimana mohammad ka

palaT di ek nazar mein jis ne kaya bazm-e-hasti ki

koi e'jaz tha ya 'azm-e-mardana mohammad ka

nazar aae jo sham'-e-rauza-e-anwar in aankhon ko

lapak kar nazr kar de jaan parwana mohammad ka

na aansu aankh ke thamte na miTti hai taDap dil ki

suna hai jab se in kanon ne afsana mohammad ka

qasam khate hain ahl-e-hosh jis ke 'aql-o-hikmat ki

KHuda shahid wo farzana hai diwana mohammad ka

nashat-e-har-do-'alam ka ise hasil samajh 'mahwi'

'ajab sahba se hai labrez paimana mohammad ka