ترکہ

میں نے بہت سی نظمیں ایسی لکھی ہیں

جو کسی کے احساس سے چرائی گئیں

کچھ میں نے بغیر پوچھے چھپا لیں

کچھ اجازت لے کر سنبھال لیں

اور کچھ دام دے کر خرید لیں

نظمیں میراث میں نہیں آئیں

یہ اس ترکے سے آئیں

جو ہمارے خاندان کو ملا ہی نہیں

جب بھی کوئی نظم لکھی

لگتا ہے یہ آخری نظم ہے

لیکن کوئی آخری نظم

آخری نہیں ہوتی

اینٹ جب دفن ہوتی ہے

تو اگلی اینٹ کے مدفن کا سبب بنتی ہے

ایک ایک پتھر کو تراشا جائے

تو راستہ بنتا ہے

میں نے اپنے اندر کے چٹیل میدان کو

ریزہ ریزہ کاٹ کر ہموار کیا ہے

تاکہ بھٹکنے والے مسافروں کو

منزل کا سراغ دکھائی نہ دے