KHabar wahshat-asar thi

ḳhabar vahshat-asar thī

use aise lagā

jaise zamīñ paañv ke nīche se saraktī jā rahī hai

tabaq sātoñ ke sātoñ āsmāñ ke is ke sar par aa gire haiñ

ik dhamāke se

nazar ke sāmne hadd-e-nazar tak ek kaalī dhuñd ke

manzar shikan parde

zamīñ se āsmāñ tak tan ga.e haiñ

havā ke paañv meñ man man kī zanjīreñ paḌī haiñ

udhar dil ko TaTolā to lagā use

ki jaise āsmāñ kī vus.atoñ meñ koī tayyāra ghirā huā āñdhiyoñ meñ

aur girdāb havā.ī meñ musalsal pai-ba-pai khātā ho hachkole

udhar chehre ko dekhā to lagā aise

ki jaise us kitāb-e-zindagī se

saare harfoñ kī chamaktī raushnā.ī uḌ chukī ho

ḳhalish aise thī siine meñ

ki jaise koī kāñTe-dār jhāḌī par mahīn malmal ko bedardī se khīñche

aur tār-o-tār kar Daale

lahū saare badan kā khiñch ke āñkhoñ ke shikasta jām-o-mīnā se

Tapaknā chāhtā thā

use is haal meñ dekhā to ā.īne chaTaḳh kar reza reza ho ga.e

aur aarzū ke us bahisht-ābād kī sab chīzeñ

apne apne markaz se lagīñ ha.Tne

falak ko chūmne vaale kalas aur kañgare pal-pal bhar meñ miTTī chāTte the

aur dhartī kī shikasta jā-ba-jā kaT jaane vaalī

sard rekhāoñ meñ apne Thokareñ khāte muqaddar DhūñDte the

daraḳht apnī jagah se hil ga.e

aur un kī shāḳhoñ par ladā sab baur

phal banñe se pahle jhaḌ gayā

ġharaz har shai pe vahshat thī

ḳhabar hī is qadar vahshat-asar thī

sunā hai jab diloñ kī lahlahātī khetiyāñ barbād hotī haiñ

to aise zalzale aayā hī karte haiñ

KHabar wahshat-asar thi

use aise laga

jaise zamin panw ke niche se sarakti ja rahi hai

tabaq saton ke saton aasman ke is ke sar par aa gire hain

ek dhamake se

nazar ke samne hadd-e-nazar tak ek kali dhund ke

manzar shikan parde

zamin se aasman tak tan gae hain

hawa ke panw mein man man ki zanjiren paDi hain

udhar dil ko TaTola to laga use

ki jaise aasman ki wusaton mein koi tayyara ghira hua aandhiyon mein

aur girdab hawai mein musalsal pai-ba-pai khata ho hachkole

udhar chehre ko dekha to laga aise

ki jaise us kitab-e-zindagi se

sare harfon ki chamakti raushnai uD chuki ho

KHalish aise thi sine mein

ki jaise koi kanTe-dar jhaDi par mahin malmal ko bedardi se khinche

aur tar-o-tar kar Dale

lahu sare badan ka khinch ke aankhon ke shikasta jam-o-mina se

Tapakna chahta tha

use is haal mein dekha to aaine chaTaKH kar reza reza ho gae

aur aarzu ke us bahisht-abaad ki sab chizen

apne apne markaz se lagin haTne

falak ko chumne wale kalas aur kangare pal-pal bhar mein miTTi chaTte the

aur dharti ki shikasta ja-ba-ja kaT jaane wali

sard rekhaon mein apne Thokaren khate muqaddar DhunDte the

daraKHt apni jagah se hil gae

aur un ki shaKHon par lada sab baur

phal banne se pahle jhaD gaya

gharaz har shai pe wahshat thi

KHabar hi is qadar wahshat-asar thi

suna hai jab dilon ki lahlahati khetiyan barbaad hoti hain

to aise zalzale aaya hi karte hain