qabih lamhon ka devta

abhī faqat tiin hī baje haiñ

abhī to us kī ragoñ kī kuchh aur raushnā.ī

tanī huī mez par paḌe

filoñ ke kāġhaz meñ jazb hogī

zarūrateñ

us ke reg-zār-e-hayāt ke

nanhe nanhe paudoñ kī ābiyārī

kisī ke nāzuk udaas hoñToñ pe

muskurāhaT kī lāla-kārī

gudāz bāñhoñ ke narm halqe meñ

garm sāñsoñ kī shab-guzārī

zarūratoñ kā vo ik pujārī

jo apne saare lahū ke ġhunche

masāfat āftāb ke

das se pāñch tak ke

qabīh lamhoñ ke devtā ke qadam pe

qurbān kar rahā hai

vo devtā

jis ne sāl-hā-sāl kī riyāzat

aur us ke ilm-o-salāhiyat ke gavāh

in degrēyoñ ke alfāz ko

jo is se libās-e-mafhūm chāhte the

barahnagī dī

zarūrateñ

is kī nanhe paudoñ

udaas hoñToñ

gudāz bāñhoñ kī roz kī haiñ

zarūratoñ kā vo ik pujārī

lahū ke ġhunchoñ kā ye chaḌhāvā to roz kā hai

abhī faqat tiin hī baje haiñ

abhi faqat tin hi baje hain

abhi to us ki ragon ki kuchh aur raushnai

tani hui mez par paDe

filon ke kaghaz mein jazb hogi

zaruraten

us ke reg-zar-e-hayat ke

nanhe nanhe paudon ki aabiyari

kisi ke nazuk udas honTon pe

muskurahaT ki lala-kari

gudaz banhon ke narm halqe mein

garm sanson ki shab-guzari

zaruraton ka wo ek pujari

jo apne sare lahu ke ghunche

masafat aaftab ke

das se panch tak ke

qabih lamhon ke dewta ke qadam pe

qurban kar raha hai

wo dewta

jis ne sal-ha-sal ki riyazat

aur us ke ilm-o-salahiyat ke gawah

in degreeyon ke alfaz ko

jo is se libas-e-mafhum chahte the

barahnagi di

zaruraten

is ki nanhe paudon

udas honTon

gudaz banhon ki roz ki hain

zaruraton ka wo ek pujari

lahu ke ghunchon ka ye chaDhawa to roz ka hai

abhi faqat tin hi baje hain