aah firaq sahab

ai parastār-e-adab rūh-e-adab shāh-e-suḳhan

zaat se terī munavvar thī adab kī anjuman

tū daraḳhshāñ māh-pāra thā adab ke charḳh kā

shakespeare shiblī aur milton se bhī tū thā baḌā

ai gul-e-naġhma ke ḳhāliq ai padam-bhushan 'firāq'

miT nahīñ saktā kabhī duniyā se terā fan 'firāq'

chhā.ī hai ġham kī ghaTā ġhamgīñ hai saarī kā.enāt

kis qadar ausāf kī hāmil thī terī ek zaat

ro rahā hai aaj har tifl-o-javāñ har ik bashar

māh-o-anjum ġhuncha-o-gul har galī har bām-o-dar

tū na.ī hindī kī tarkīboñ ko raa.ij kar gayā

jo tahī goshe the urdu ke unheñ to bhar gayā

loch thī terī zabāñ meñ tere naġhmoñ meñ kashish

tū nahīñ to khaa.e jaatī hai mujhe dil kī ḳhalish

saaz se āvāz se tū ne sañvārī har ġhazal

ik na.e andāz se tū ne sañvārī har ġhazal

ai mujāhid ai mu'allim ai suḳhnavar ‘asr-sāz

ham na bhūleñge tirā andāz-e-fan soz o gudāz

naam terā sone ke lafzoñ meñ likkhā jā.egā

har mo.arriḳh har adiib apnī zabāñ par lā.egā

ai parastar-e-adab ruh-e-adab shah-e-suKHan

zat se teri munawwar thi adab ki anjuman

tu daraKHshan mah-para tha adab ke charKH ka

shakespeare shibli aur milton se bhi tu tha baDa

ai gul-e-naghma ke KHaliq ai padam-bhushan 'firaq'

miT nahin sakta kabhi duniya se tera fan 'firaq'

chhai hai gham ki ghaTa ghamgin hai sari kaenat

kis qadar ausaf ki hamil thi teri ek zat

ro raha hai aaj har tifl-o-jawan har ek bashar

mah-o-anjum ghuncha-o-gul har gali har baam-o-dar

tu nai hindi ki tarkibon ko raij kar gaya

jo tahi goshe the urdu ke unhen to bhar gaya

loch thi teri zaban mein tere naghmon mein kashish

tu nahin to khae jati hai mujhe dil ki KHalish

saz se aawaz se tu ne sanwari har ghazal

ek nae andaz se tu ne sanwari har ghazal

ai mujahid ai mu'allim ai suKHnawar ‘asr-saz

hum na bhulenge tera andaz-e-fan soz o gudaz

nam tera sone ke lafzon mein likkha jaega

har moarriKH har adib apni zaban par laega