آہ فراق صاحب

اے پرستار ادب روح ادب شاہ سخن

ذات سے تیری منور تھی ادب کی انجمن

تو درخشاں ماہ پارہ تھا ادب کے چرخ کا

شیکسپئیر شبلی اور ملٹن سے بھی تو تھا بڑا

اے گل نغمہ کے خالق اے پدم بھوشن فراقؔ

مٹ نہیں سکتا کبھی دنیا سے تیرا فن فراقؔ

چھائی ہے غم کی گھٹا غمگیں ہے ساری کائنات

کس قدر اوصاف کی حامل تھی تیری ایک ذات

رو رہا ہے آج ہر طفل و جواں ہر اک بشر

ماہ و انجم غنچہ و گل ہر گلی ہر بام و در

تو نئی ہندی کی ترکیبوں کو رائج کر گیا

جو تہی گوشے تھے اردو کے انہیں تو بھر گیا

لوچ تھی تیری زباں میں تیرے نغموں میں کشش

تو نہیں تو کھائے جاتی ہے مجھے دل کی خلش

ساز سے آواز سے تو نے سنواری ہر غزل

اک نئے انداز سے تو نے سنواری ہر غزل

اے مجاہد اے معلم اے سخنور عصر ساز

ہم نہ بھولیں گے ترا انداز فن سوز و گداز

نام تیرا سونے کے لفظوں میں لکھا جائے گا

ہر مورخ ہر ادیب اپنی زباں پر لائے گا