aalam-e-ujlat

ā.īna-ḳhāna-e-ālam mujhe ma.alūm hai ye

mauja-e-vaqt pe jo aks ubharte haiñ yahāñ

un kī qismat meñ fanā likhī hai

na to imroz hai kuchh aur na hī fardā hai

ek do roz kā lamha hai ye hastī apnī

saikḌoñ aks ubharte haiñ bikharne ke liye

ā.īna-ḳhāne kī vīrānī kā aalam ye hai

ek bhī aks ko mahfūz nahīñ rahnā hai

aks-dar-aks ajab ālam-e-ujlat hai yahāñ

roz tasvīr badal jaatī hai mai-ḳhāne meñ

sāġhar-e-hast uThāne bhī nahīñ paate abhī

sāqī-e-nīst hameñ jām-e-fanā detā hai

hai ajab ālam-e-ujlat ki yahāñ har lamha

dūsre lamhe ko khā jaatā hai qātil ban kar

āb-o-gil gūñdh ke kuuze jo banā.e ga.e haiñ

un kī taḳhlīq kā hāsil hī bikharnā Thahrā

kūza-gar kyā tujhe taklīf nahīñ hotī jab

terā fan ḳhaak meñ mil jaatā hai

aaina-KHana-e-alam mujhe malum hai ye

mauja-e-waqt pe jo aks ubharte hain yahan

un ki qismat mein fana likhi hai

na to imroz hai kuchh aur na hi farda hai

ek do roz ka lamha hai ye hasti apni

saikDon aks ubharte hain bikharne ke liye

aaina-KHane ki virani ka aalam ye hai

ek bhi aks ko mahfuz nahin rahna hai

aks-dar-aks ajab aalam-e-ujlat hai yahan

roz taswir badal jati hai mai-KHane mein

saghar-e-hast uThane bhi nahin pate abhi

saqi-e-nist hamein jam-e-fana deta hai

hai ajab aalam-e-ujlat ki yahan har lamha

dusre lamhe ko kha jata hai qatil ban kar

aab-o-gil gundh ke kuze jo banae gae hain

un ki taKHliq ka hasil hi bikharna Thahra

kuza-gar kya tujhe taklif nahin hoti jab

tera fan KHak mein mil jata hai