aamad-e-sal-e-nau aur bad-nasib hindi

aamad hai sāl-e-nau kī samāñ hai bahār kā

sarsabz gulistāñ hai dil-e-dāġh-dār kā

ishq-e-vatan meñ āshiq-e-sādiq hai jāñ-ba-lab

kyā haal pūchhte ho ġharīb-ud-dayār kā

yārab kaheñge kis tarah ham bekasoñ ke din

yaad aayā hai qafas meñ zamāna bahār kā

yuuñ ashk-e-ġham Tapakte haiñ āñkhoñ se qaum kī

mumkin nahīñ hai TūTnā ashkoñ ke taar kā

ik baar qatl-e-ām karo teġh-e-zulm se

achchhā nahīñ hai jaur-o-sitam baar baar kā

ai māder-e-vatan ke sapūto baḌhe chalo

ye aaj ho rahā hai ishāra bahār kā

qātil ko naaz quvvat-e-bāzū pe hai agar

mazlūm ko bharosā hai parvardigār kā

ai māder-e-vatan zarā dast-e-duā uThā

maqtal meñ imtihāñ hai tire ġham-gusār kā

girgiT kī tarah rañg badaltā hai dam-ba-dam

kyā e'tibār ġhair ke qaul-o-qarār kā

aġhyār se karam kī tavaqqo fuzūl hai

arsa guzar chukā hai bahut intizār kā

ai 'āftāb' dahr kā shikva hai kyoñ tujhe

hotā nahīñ hai koī dil-e-be-qarār kā

aamad hai sal-e-nau ki saman hai bahaar ka

sarsabz gulistan hai dil-e-dagh-dar ka

ishq-e-watan mein aashiq-e-sadiq hai jaan-ba-lab

kya haal puchhte ho gharib-ud-dayar ka

yarab kahenge kis tarah hum bekason ke din

yaad aaya hai qafas mein zamana bahaar ka

yun ashk-e-gham Tapakte hain aankhon se qaum ki

mumkin nahin hai TuTna ashkon ke tar ka

ek bar qatl-e-am karo tegh-e-zulm se

achchha nahin hai jaur-o-sitam bar bar ka

ai mader-e-watan ke saputo baDhe chalo

ye aaj ho raha hai ishaara bahaar ka

qatil ko naz quwwat-e-bazu pe hai agar

mazlum ko bharosa hai parwardigar ka

ai mader-e-watan zara dast-e-dua uTha

maqtal mein imtihan hai tere gham-gusar ka

girgiT ki tarah rang badalta hai dam-ba-dam

kya e'tibar ghair ke qaul-o-qarar ka

aghyar se karam ki tawaqqo fuzul hai

arsa guzar chuka hai bahut intizar ka

ai 'aftab' dahr ka shikwa hai kyon tujhe

hota nahin hai koi dil-e-be-qarar ka