aansuon ke ratjagon se

saare manzar ek jaise

saarī duniyā ek sī

nāshpātī ke daraḳhtoñ se

khajūroñ kī ghanī shāḳhoñ talak

duniyā achānak ek jaisī ho ga.ī hai

misr ke ahrām kī mahzūñ fazā.eñ

dam-ba-ḳhud haiñ kuufa o baġhdād ke bāzār meñ

kāzimain o mash.had-e-e.arāq se nauhe nikal kar

sarhad-e-labnān tak pahuñche hue haiñ

shahr-e-dillī ke añdhere

zulmat-e-lahore se milne lage haiñ

shor kābul kā sunā.ī detā hai

bartānia kī mahfiloñ meñ

ḳhvāhish-e-newyark zinda hotī hai

Dhāke kī purānī dilrubā galiyoñ meñ

goyā saarī duniyā ek jaisī ho ga.ī hai

saare manzar ek se

ujḌī huī āñkhoñ meñ saare ḳhvāb

yādoñ kā fusūñ ummīd ke saare fasurda āftāb

ek ho sakte haiñ

aao in se mil-milā kar ik jahān-e-tāza-tar paidā kareñ

in lahū kī būñdoñ se

raste sajā.eñ

āñsuoñ ke ratjagoñ se ārzū-e-chashm-e-tar paidā kareñ

sare manzar ek jaise

sari duniya ek si

nashpati ke daraKHton se

khajuron ki ghani shaKHon talak

duniya achanak ek jaisi ho gai hai

misr ke ahram ki mahzun fazaen

dam-ba-KHud hain kufa o baghdad ke bazar mein

kazimain o mashhad-e-earaq se nauhe nikal kar

sarhad-e-labnan tak pahunche hue hain

shahr-e-dilli ke andhere

zulmat-e-lahore se milne lage hain

shor kabul ka sunai deta hai

bartania ki mahfilon mein

KHwahish-e-newyark zinda hoti hai

Dhake ki purani dilruba galiyon mein

goya sari duniya ek jaisi ho gai hai

sare manzar ek se

ujDi hui aankhon mein sare KHwab

yaadon ka fusun ummid ke sare fasurda aaftab

ek ho sakte hain

aao in se mil-mila kar ek jahan-e-taza-tar paida karen

in lahu ki bundon se

raste sajaen

aansuon ke ratjagon se aarzu-e-chashm-e-tar paida karen