aansu ki wajh

jab ham daraḳht banñā chāhte haiñ

aur ban jaate haiñ

lekin

ham kisī ko saaya nahīñ de paate

koī parinda hamārī shāḳhoñ par giit nahīñ gaatā

koī gilahrī hamāre tane meñ apnā ghar nahīñ banātī

hamārī koñpaloñ par kabhī os nahīñ chamaktī

aur hazāroñ saal tak hameñ dīmak nahīñ lagtī

jab ham rāsta ban jaanā chāhte haiñ

aur ban jaate haiñ ek pul

aur saarī zindagī

ek hī jagah guzār dete haiñ

aur sab hameñ paar kar ke zindagī bhar ke liye

bichhaḌte rahte haiñ

kisī ḳhāna-jañgī meñ hameñ aag nahīñ lagtī

aur hamāre TukḌe duur duur tak

ek saath nahīñ bahte

jab ham samundar banñā chāhte haiñ

aur mahz ek aañsū ban ke

kisī rumāl meñ jagah banā lete haiñ

aur koī use siine se nahīñ lagātā

apnī kalā.ī par nahīñ bāñdhtā

koī use jalā ke raakh

kisī zaḳhm meñ nahīñ bhartā

jab ham ek kahānī banñā chāhte haiñ

aur sirf ek lafz ban ke

sard hoñToñ se adā hote haiñ

aur phir hamesha ḳhalāoñ meñ bhaTakte rahte haiñ

yā fazā meñ gūñjte rahte haiñ

yā shāyad ye lafz dil kī gahrā.ī se

kabhī bāhar nahīñ nikal paatā

aur hamesha ke liye

hamārī tarah

farāmosh kar diyā jaatā hai

jab hum daraKHt banna chahte hain

aur ban jate hain

lekin

hum kisi ko saya nahin de pate

koi parinda hamari shaKHon par git nahin gata

koi gilahri hamare tane mein apna ghar nahin banati

hamari konpalon par kabhi os nahin chamakti

aur hazaron sal tak hamein dimak nahin lagti

jab hum rasta ban jaana chahte hain

aur ban jate hain ek pul

aur sari zindagi

ek hi jagah guzar dete hain

aur sab hamein par kar ke zindagi bhar ke liye

bichhaDte rahte hain

kisi KHana-jangi mein hamein aag nahin lagti

aur hamare TukDe dur dur tak

ek sath nahin bahte

jab hum samundar banna chahte hain

aur mahz ek aansu ban ke

kisi rumal mein jagah bana lete hain

aur koi use sine se nahin lagata

apni kalai par nahin bandhta

koi use jala ke rakh

kisi zaKHm mein nahin bharta

jab hum ek kahani banna chahte hain

aur sirf ek lafz ban ke

sard honTon se ada hote hain

aur phir hamesha KHalaon mein bhaTakte rahte hain

ya faza mein gunjte rahte hain

ya shayad ye lafz dil ki gahrai se

kabhi bahar nahin nikal pata

aur hamesha ke liye

hamari tarah

faramosh kar diya jata hai