آؤ بچو ہم سب بنائیں

اپنا اپنا بھول کلینڈر

جتنا کچھ ہم بھول گئے ہیں

جو جو ہم سے بھول ہوئی ہے

وہ سب لکھیں

وہ بھی جو ہم بھولنا چاہتے ہیں

وہ بھی جو ہم بھول نہیں پاتے ہیں

وہ سب چہرے جو یادوں کی بھول بھلیوں میں سوتے ہیں

انہیں جگا دیں

بھول کلینڈر میں ان کی تصویر لگا دیں

اور روزانہ بھول کلینڈر دیکھ کے نکلیں

اس دن پچھلے برس میں ہم نے کیا بویا تھا کیا پایا تھا

کیا پانے سے کیا کھویا تھا

کیا کھونے سے کیا پایا تھا

مشکل کے کس کس لمحے میں

کس نے اپنا ہاتھ چھڑایا

اور کون کتنا کام آیا تھا

بھول نہ جانا بھول کلینڈر

اب روزانہ بھول کلینڈر