aap bhi to kuchh bolen

raat chāhe jitnī bhī

be-hayā ho kaalī ho

aas ke sitāroñ se āsmān ḳhālī ho

sub.h kī hikāyat par gāliyoñ kī bārish ho

aur ghup añdhere se sab pe ḳhauf taarī ho

phir bhī raat jā.egī

phir bhī sub.h aa.egī

chāhe jaisā patjhaḌ ho

jitnā tez jhakkaḌ ho

bijliyoñ kā kaḌkā ho

āshiyāñ ke jalne kā sub.h-o-shām dhaḌkā ho

bāġhbāñ nigoḌā ho

baaġh chhoḌ kar apnā

dar-ba-dar bhaTaktā ho

peḌ paude jalte hoñ man kī baat kartā ho

aur nero ke jaisā bāñsurī bajātā ho

phir bhī koñpleñ taaza

shāḳh-shāḳh phūTeñgī

phir bahār aa.egī

bāñjh-rut ye jā.egī

lekin ai gulistāñ ke jāñ-nisār parvāno

raushnī ke dīvāno

sub.h-e-nau ke aane meñ aap kā kyā hissa ho

aap bhī to muñh kholeñ

mar ga.e ki zinda haiñ

aap bhī to kuchh boleñ

raat chahe jitni bhi

be-haya ho kali ho

aas ke sitaron se aasman KHali ho

subh ki hikayat par galiyon ki barish ho

aur ghup andhere se sab pe KHauf tari ho

phir bhi raat jaegi

phir bhi subh aaegi

chahe jaisa patjhaD ho

jitna tez jhakkaD ho

bijliyon ka kaDka ho

aashiyan ke jalne ka subh-o-sham dhaDka ho

baghban nigoDa ho

bagh chhoD kar apna

dar-ba-dar bhaTakta ho

peD paude jalte hon man ki baat karta ho

aur nero ke jaisa bansuri bajata ho

phir bhi konplen taza

shaKH-shaKH phuTengi

phir bahaar aaegi

banjh-rut ye jaegi

lekin ai gulistan ke jaan-nisar parwano

raushni ke diwano

subh-e-nau ke aane mein aap ka kya hissa ho

aap bhi to munh kholen

mar gae ki zinda hain

aap bhi to kuchh bolen