aasman ki sair

pariyoñ kā koī qissa aao tumheñ sunā.ūñ

kuchh sair āsmāñ kī aao tumheñ karā.ūñ

rahtī hai pyārī pyārī pariyāñ jo āsmāñ meñ

pariyoñ se āsmāñ kī aao tumheñ milā.ūñ

gaa.eñ surīle naġhme nācheñ bhī ḳhuub pariyāñ

pariyoñ kā naach gaanā aao tumheñ dikhā.ūñ

peñgeñ baḌhā baḌhā kar chhū leñ vo bādaloñ ko

ākāsh ke vo jhūle aao tumheñ jhulā.ūñ

qaus-e-quzah se le kar rangoñ se kheleñ holī

le jā ke un rangoñ meñ aao tumheñ rañgā.ūñ

sone kī chhat gharoñ kī dīvāreñ nuqra.ī haiñ

le jā ke un gharoñ meñ aao tumheñ basā.ūñ

niklo gumāñ se bāhar aur ḳhatm sair kar lo

ḳhvāboñ kī niiñd se ab aao tumheñ jagā.ūñ

pariyon ka koi qissa aao tumhein sunaun

kuchh sair aasman ki aao tumhein karaun

rahti hai pyari pyari pariyan jo aasman mein

pariyon se aasman ki aao tumhein milaun

gaen surile naghme nachen bhi KHub pariyan

pariyon ka nach gana aao tumhein dikhaun

pengen baDha baDha kar chhu len wo baadalon ko

aakash ke wo jhule aao tumhein jhulaun

qaus-e-quzah se le kar rangon se khelen holi

le ja ke un rangon mein aao tumhein rangaun

sone ki chhat gharon ki diwaren nuqrai hain

le ja ke un gharon mein aao tumhein basaun

niklo guman se bahar aur KHatm sair kar lo

KHwabon ki nind se ab aao tumhein jagaun