آواز محبت کی

جاگ ارے بھوکے مزدور

سارا عالم جاگ رہا ہے

عیش و طرب سب تیاگ رہا ہے

لوہے کا یہ سینہ تیرا تری محنتیں تری جوانی

دیکھ تری کٹیا میں ننگی بھوکی روتی تیری رانی

تیرے بچے بلک رہے ہیں گھاس پھوس سے بھوک مٹاتے

سرمایہ داروں کے گھر کے کتے تک سکھ چین اٹھاتے

تری کمائی ترا پسینہ

یہ ترا مرنا تیرا جینا

جاگ اٹھی ہے گاؤں کی آشا

ترا ایشیا جاگ اٹھا ہے

جاگ پڑے دنیا کے سارے دکھیا اور مجبور

جاگ ارے بھوکے مزدور

تیری دنیا کے کونوں میں دھدھک رہی ہے بھوک کی جوالا

تیری آنکھوں تلے اندھیرا محلوں میں دن رات اجالا

ملوں کی چمنی سے اٹھتا ہے دھواں ہے تیرے بل کی نشانی

سائیں سائیں کھٹ پٹ چلتی ہیں کلیں جو کہتی تری کہانی

ملوں کا داتا کون ہے آخر

بھیک مانگتا کون ہے در در

بے کاروں پر دکھیاروں پر

دکھوں کا بادل ٹوٹ پڑا ہے

پونجی پتیوں سے یہ پوچھو کون ہے غم سے چور

جاگ ارے بھوکے مزدور