ab Dar nahin lagta

ek Dar thā tanhā.ī kā

ek Dar thā judā.ī kā

jo musalsal mere saath rahtā thā

kal kā din jo guzar gayā

bahut bhārī lagtā thā

lagtā thā kisī aise din kā bojh uThā na pā.ūñgī

ādhe-adhūre rāste meñ hī mar jā.ūñgī

magar kal kā din bhī aa hī gayā

aur ret kā vo gharauñdā saath hī bahā le gayā

jis meñ rakhe the maiñ ne

rañg-ba-rañg ke pyāre patthar

titliyoñ ke par aur mor ke pañkh

phūloñ ke sab rañg

aur āsmān kī dhanak

gilahrī kā adh khāyā aḳhroT

maañ ke paroñ tale baiThe murġhābī ke bachche

us gharauñde par utrī dhuup jis ne mujh se merā saaya judā kar diyā thā

kal jab vo sab be-rahm vaqt kī maujoñ ke saath bah gayā

aur chār-sū qabr jaisā añdherā phail gayā

to safed dhuup jaate jaate ek ehsān kar ga.ī

vo mujh ko merā saaya lauTā ga.ī

aur maiñ marte marte bach ga.ī varna

maiñ to aise kal meñ mar hī jaatī

āvāzoñ ke bichhaḌne se

ek Dar tha tanhai ka

ek Dar tha judai ka

jo musalsal mere sath rahta tha

kal ka din jo guzar gaya

bahut bhaari lagta tha

lagta tha kisi aise din ka bojh uTha na paungi

aadhe-adhure raste mein hi mar jaungi

magar kal ka din bhi aa hi gaya

aur ret ka wo gharaunda sath hi baha le gaya

jis mein rakhe the main ne

rang-ba-rang ke pyare patthar

titliyon ke par aur mor ke pankh

phulon ke sab rang

aur aasman ki dhanak

gilahri ka adh khaya aKHroT

man ke paron tale baiThe murghabi ke bachche

us gharaunde par utri dhup jis ne mujh se mera saya juda kar diya tha

kal jab wo sab be-rahm waqt ki maujon ke sath bah gaya

aur chaar-su qabr jaisa andhera phail gaya

to safed dhup jate jate ek ehsan kar gai

wo mujh ko mera saya lauTa gai

aur main marte marte bach gai warna

main to aise kal mein mar hi jati

aawazon ke bichhaDne se