abhi barf-bari thami hai

bahut duur kyoñ bhiiḌ se maiñ khaḌā huuñ

mujhe log kyoñ der se tak rahe haiñ

mujhe kyā

dhanak-rang holī kā uḌtā gulāl

machaltā huā ruup rang

mujhe vaqt ne jaise bachpan se pahle javānī atā kī

javānī se pahle hī dil kā lahū munjamid kar diyā

vaqt ne toḌ Daale khilaune sabhī lazzat-e-shauq ke

mere ruḳhsār kī jhurriyāñ

aañkh kī kauḌiyāñ

zehn kī khiḌkiyāñ paañv kī beḌiyāñ

vaqt kī barf-bārī kā in.aam haiñ

bahut duur kyoñ bhiiḌ se maiñ khaḌā huuñ

mujhe log kyoñ der se tak rahe haiñ

bhiiḌ kyā kaun se log haiñ

mehrbānoñ kī rishtoñ kī nātoñ kī bhiiḌ

jinheñ mujh se baḌh kar tamanna hai tanḳhvāh ke cheque kī

bhiiḌ kyā kaun se log haiñ

mirī ġham-navāzī se baḌh kar jinheñ sirf coffē kā piyāla bahut hai

bhiiḌ kyā kaun sab haiñ

un hasīnāoñ kī jin ke āñchal kabhī ḳhvāb meñ bhī na bhīge

merī chaah meñ

mujhe bhiiḌ se vāsta kyā

mujhe kyā dhanak rang holī kā uḌtā gulāl

mujhe apne marqad pe hañsne kā mauqa milā

abhī barf-bārī thamī hai

zarā vaqt kī chaal maddham huī hai

bahut dur kyon bhiD se main khaDa hun

mujhe log kyon der se tak rahe hain

mujhe kya

dhanak-rang holi ka uDta gulal

machalta hua rup rang

mujhe waqt ne jaise bachpan se pahle jawani ata ki

jawani se pahle hi dil ka lahu munjamid kar diya

waqt ne toD Dale khilaune sabhi lazzat-e-shauq ke

mere ruKHsar ki jhurriyan

aankh ki kauDiyan

zehn ki khiDkiyan panw ki beDiyan

waqt ki barf-bari ka inam hain

bahut dur kyon bhiD se main khaDa hun

mujhe log kyon der se tak rahe hain

bhiD kya kaun se log hain

mehrbanon ki rishton ki naton ki bhiD

jinhen mujh se baDh kar tamanna hai tanKHwah ke cheque ki

bhiD kya kaun se log hain

meri gham-nawazi se baDh kar jinhen sirf coffee ka piyala bahut hai

bhiD kya kaun sab hain

un hasinaon ki jin ke aanchal kabhi KHwab mein bhi na bhige

meri chah mein

mujhe bhiD se wasta kya

mujhe kya dhanak rang holi ka uDta gulal

mujhe apne marqad pe hansne ka mauqa mila

abhi barf-bari thami hai

zara waqt ki chaal maddham hui hai