adl-e-jahangiri

qasr-e-shāhī meñ ki mumkin nahīñ ġhairoñ kā guzar

ek din nūr-jahāñ baam pe thī jalva-figan

koī shāmat-zada rahgīr udhar aa niklā

garche thī qasr meñ har chaar taraf se qadġhan

ġhairat-e-husn se begam ne tamancha maarā

ḳhaak par Dher thā ik kushta-e-be-gor-o-kafan

saath hī shah-e-jahāñgīr ko pahuñchī jo ḳhabar

ġhaiz se aa ga.ī abrū-e-adālat pe shikan

hukm bhejā ki kanīzān-e-shabistān-e-shahī

jā ke pūchh aa.eñ ki sach yā ki ġhalat hai ye suḳhan

naḳhvat-e-husn se begam ne ba-sad-nāz kahā

merī jānib se karo arz ba-ā.īn-e-hasan

haañ mujhe vāq.ea-e-qatl se inkār nahīñ

mujh se nāmūs-e-hayā ne ye kahā thā ki bazan

us kī gustāḳh-nigāhī ne kiyā us ko halāk

kishvar-e-husn meñ jaarī hai yahī shara-e-kuhan

mufti-e-dīñ se jahāñgīr ne fatvā pūchhā

ki sharī.at meñ kisī ko nahīñ kuchh jā-e-suḳhan

mufti-e-dīn ne be-ḳhauf-o-ḳhatar saaf kahā

shar.a kahtī hai ki qātil kī uḌā do gardan

log darbār meñ is hukm se tharrā uTThe

par jahāñgīr ke abrū pe na bal thā na shikan

tarkashoñ ko ye diyā hukm ki andar jā kar

pahle begam ko kareñ basta-e-zanjīr-o-rasan

phir usī tarah use khīñch ke bāhar laa.eñ

aur jallād ko deñ hukm ki haañ teġh bazan

ye vahī nūr-jahāñ hai ki haqīqat meñ yahī

thī jahāñgīr ke parde meñ shahanshāh-e-zaman

us kī peshāni-e-nāzuk pe jo paḌtī thī girah

jā ke ban jaatī thī aurāq-e-hukūmat pe shikan

ab na vo nūr-jahāñ hai na vo andāz-e-ġhurūr

na vo ġhamze haiñ na vo arbada-e-sabr-shikan

ab vahī paañv har ik gaam pe tharrāte haiñ

jin kī raftār se pāmāl the murġhān-e-chaman

ek mujrim hai ki jis kā koī haamī na shafī

ek bekas hai ki jis kā na koī ghar na vatan

ḳhidmat-e-shāh meñ begam ne ye bhejā paiġhām

ḳhūñ-bahā bhī to sharī.at meñ ik amr-e-ahsan

mufti-e-sharā se phir shaah ne fatvā pūchhā

bole jaa.ez hai razā-mand huuñ gar bachcha o zan

vārisoñ ko jo diye laakh diram begam ne

sab ne darbār meñ kī arz ki ai shāh-e-zaman

ham ko maqtūl kā lenā nahīñ manzūr qisās

qatl kā hukm jo ruk jaa.e to hai mustahsan

ho chukā jab ki shahanshāh ko puurā ye yaqīn

ki nahīñ is meñ koī shā.eba-e-hīla-o-fan

uTh ke darbār se āhista chalā sū-e-haram

thī jahāñ nūr-jahāñ mo'takif-e-bait-e-ḳhazan

daf.atan paañv pe begam ke girā aur ye kahā

tū agar kushta shudī aah che mī kardam man

qasr-e-shahi mein ki mumkin nahin ghairon ka guzar

ek din nur-jahan baam pe thi jalwa-figan

koi shamat-zada rahgir udhar aa nikla

garche thi qasr mein har chaar taraf se qadghan

ghairat-e-husn se begam ne tamancha mara

KHak par Dher tha ek kushta-e-be-gor-o-kafan

sath hi shah-e-jahangir ko pahunchi jo KHabar

ghaiz se aa gai abru-e-adalat pe shikan

hukm bheja ki kanizan-e-shabistan-e-shahi

ja ke puchh aaen ki sach ya ki ghalat hai ye suKHan

naKHwat-e-husn se begam ne ba-sad-naz kaha

meri jaanib se karo arz ba-ain-e-hasan

han mujhe waqea-e-qatl se inkar nahin

mujh se namus-e-haya ne ye kaha tha ki bazan

us ki gustaKH-nigahi ne kiya us ko halak

kishwar-e-husn mein jari hai yahi shara-e-kuhan

mufti-e-din se jahangir ne fatwa puchha

ki shariat mein kisi ko nahin kuchh ja-e-suKHan

mufti-e-din ne be-KHauf-o-KHatar saf kaha

shara kahti hai ki qatil ki uDa do gardan

log darbar mein is hukm se tharra uTThe

par jahangir ke abru pe na bal tha na shikan

tarkashon ko ye diya hukm ki andar ja kar

pahle begam ko karen basta-e-zanjir-o-rasan

phir usi tarah use khinch ke bahar laen

aur jallad ko den hukm ki han tegh bazan

ye wahi nur-jahan hai ki haqiqat mein yahi

thi jahangir ke parde mein shahanshah-e-zaman

us ki peshani-e-nazuk pe jo paDti thi girah

ja ke ban jati thi auraq-e-hukumat pe shikan

ab na wo nur-jahan hai na wo andaz-e-ghurur

na wo ghamze hain na wo arbada-e-sabr-shikan

ab wahi panw har ek gam pe tharraate hain

jin ki raftar se pamal the murghan-e-chaman

ek mujrim hai ki jis ka koi hami na shafi

ek bekas hai ki jis ka na koi ghar na watan

KHidmat-e-shah mein begam ne ye bheja paigham

KHun-baha bhi to shariat mein ek amr-e-ahsan

mufti-e-shara se phir shah ne fatwa puchha

bole jaez hai raza-mand hun gar bachcha o zan

warison ko jo diye lakh diram begam ne

sab ne darbar mein ki arz ki ai shah-e-zaman

hum ko maqtul ka lena nahin manzur qisas

qatl ka hukm jo ruk jae to hai mustahsan

ho chuka jab ki shahanshah ko pura ye yaqin

ki nahin is mein koi shaeba-e-hila-o-fan

uTh ke darbar se aahista chala su-e-haram

thi jahan nur-jahan mo'takif-e-bait-e-KHazan

dafatan panw pe begam ke gira aur ye kaha

tu agar kushta shudi aah che mi kardam man