afimi so raha hai

afīmī zulm ko taqdīr kah kar so rahā hai

so hiran ko sher khā jaa.e

uqāboñ ke jhapaTte ġhol sahme memne ko nochte jaa.eñ

koī bakrī kisī chīte ko thoḌī ghaas ke badle sabhī aa'zā khilā baiThe

hazāroñ makkhiyoñ kī saḳht mehnat se banā saare kā saarā shahd koī rīchh le jaa.e

kisī bandar ke pāgalpan meñ pheñke pattharoñ se uḌne vaalī koī chingārī bhale jangal jalā Daale

hazāroñ ghaas ḳhoroñ ne ka.ī din se galoñ ko ḳhushk rakkhā ho

nadī meñ ḳhuun kī bū ho

nadī meñ ḳhuun bhar jaa.e

nadī ko aag lag jaa.e

afīmī kī balā se

afiim aisā nasha hai jis kā 'aadī niiñd ko hī mas.aloñ kā hal samajhtā hai

suhāne ḳhvāb aate haiñ

afīmī sabz lafzoñ se banī loī ke nīche soyā rahtā hai

afīmī iiñT bajrī ret cement se bane jangal kī ġhāroñ meñ maze se soyā rahtā hai

so ḳhvābīda afīmī ko to chāhe maar bhī Daalo

use kyā farq paḌnā hai

magar us niiñd se us ko jagāne kī himāqat koī mat karnā

afīmī kaaT khā.egā

afīmī aag meñ jalte hue mā'sūm logoñ ko maze se sabr kī talqīn kar ke so rahā hai

afīmī so rahā hai

afimi zulm ko taqdir kah kar so raha hai

so hiran ko sher kha jae

uqabon ke jhapaTte ghol sahme memne ko nochte jaen

koi bakri kisi chite ko thoDi ghas ke badle sabhi aa'za khila baiThe

hazaron makkhiyon ki saKHt mehnat se bana sare ka sara shahd koi richh le jae

kisi bandar ke pagalpan mein phenke pattharon se uDne wali koi chingari bhale jangal jala Dale

hazaron ghas KHoron ne kai din se galon ko KHushk rakkha ho

nadi mein KHun ki bu ho

nadi mein KHun bhar jae

nadi ko aag lag jae

afimi ki bala se

afim aisa nasha hai jis ka 'adi nind ko hi masalon ka hal samajhta hai

suhane KHwab aate hain

afimi sabz lafzon se bani loi ke niche soya rahta hai

afimi inT bajri ret cement se bane jangal ki ghaaron mein maze se soya rahta hai

so KHwabida afimi ko to chahe mar bhi Dalo

use kya farq paDna hai

magar us nind se us ko jagane ki himaqat koi mat karna

afimi kaT khaega

afimi aag mein jalte hue ma'sum logon ko maze se sabr ki talqin kar ke so raha hai

afimi so raha hai