ahl-e-dil ko bula raha hun

mujhe vadī.at huī hai

jab tak tumhārī āñkheñ

maqām-e-bīnā.ī tak na pahuñchīñ

safed kāġhaz kī raushnī ko

siyāh alfāz se musalsal chhupā.e rakhkhūñ

kahā gayā hai ye qaul bhī duuñ

jab āñkheñ ḳhīra na hoñgī

(yānī maqām-e-bīnā.ī par pahuñch jā.eñgī)

to kāġhaz siyāh karnā maiñ chhoḌ dūñgā

nafī-e-mau.ūd haiñ ye alfāz

asal isbāt chashm-e-bīnā

safed kāġhaz meñ paḌh rahī haiñ

ki harf-e-mau.ūd bhī yahī hai

maiñ sat.h-e-kāġhaz se apne alfāz uThā rahā huuñ

ahl-e-dil ko bulā rahā huuñ

mujhe wadiat hui hai

jab tak tumhaari aankhen

maqam-e-binai tak na pahunchin

safed kaghaz ki raushni ko

siyah alfaz se musalsal chhupae rakhkhun

kaha gaya hai ye qaul bhi dun

jab aankhen KHira na hongi

(yani maqam-e-binai par pahunch jaengi)

to kaghaz siyah karna main chhoD dunga

nafi-e-mauud hain ye alfaz

asal isbaat chashm-e-bina

safed kaghaz mein paDh rahi hain

ki harf-e-mauud bhi yahi hai

main sath-e-kaghaz se apne alfaz uTha raha hun

ahl-e-dil ko bula raha hun