ai hamraaz

ye ujlī sī zamīñ nazroñ kī had se aur aage tak

shajar phaile chale jaate haiñ apnī had se aage tak

mire kamre kī sab chiñgāriyāñ shāḳhoñ pe chamkī haiñ

mire bāloñ pe bikhrī haiñ mire āñchal se simTī haiñ

sahar kī phūTtī kirneñ taḌap aa.ī darīche se

lipaT kar kheltī haiñ mere ghar ke farsh-e-maḳhmal se

ta.ayyush ke har ik sāmān par ik nuur bikhrā hai

ye be-rañgī pe sat-rañgī dhanak kā jaal phailā hai

bahut āhista āhista mere kānoñ se ye kahtī haiñ

batā ab kyuuñ mirī āñkheñ tujhe be-jān lagtī haiñ

ye kis kī fikr meñ tum ho ye kis kī khoj meñ tum ho

maiñ samjhī apne in guzre dinoñ kī soch meñ tum ho

chalo DhūñDo unheñ apne ḳhayāloñ apne ḳhvāboñ meñ

kahīñ tāqoñ pe ab rakkhī huī pichhlī kitāboñ meñ

pyālī chaa.e kī Table pe rakh ke sar-nigūñ uTThī

ḳhayāloñ aur ḳhvāboñ kī vo duniyā DhūñDne niklī

vo sohā rañg jis meñ ammāñ merī saarī rañgtī thiiñ

vo afshāñ abraqoñ kī jo sitāroñ sī chamaktī thiiñ

vo mehñdī jis kī surḳhī se koī surḳhī na miltī thī

vo missī jis se bū belī chamelī kī nikaltī thī

mirī hamrāz kirneñ tujh ko maiñ ab kaise samjhā.ūñ

terī āġhosh ko in ḳhushbuoñ se kaise mahkā.ūñ

ye ujlī aur ThanDī dhuup meñ phailī huī shāḳheñ

maiñ in barfīlī shāḳhoñ meñ kahāñ se phuul le aa.uuñ

ye ujli si zamin nazron ki had se aur aage tak

shajar phaile chale jate hain apni had se aage tak

mere kamre ki sab chingariyan shaKHon pe chamki hain

mere baalon pe bikhri hain mere aanchal se simTi hain

sahar ki phuTti kirnen taDap aai dariche se

lipaT kar khelti hain mere ghar ke farsh-e-maKHmal se

tayyush ke har ek saman par ek nur bikhra hai

ye be-rangi pe sat-rangi dhanak ka jal phaila hai

bahut aahista aahista mere kanon se ye kahti hain

bata ab kyun meri aankhen tujhe be-jaan lagti hain

ye kis ki fikr mein tum ho ye kis ki khoj mein tum ho

main samjhi apne in guzre dinon ki soch mein tum ho

chalo DhunDo unhen apne KHayalon apne KHwabon mein

kahin taqon pe ab rakkhi hui pichhli kitabon mein

pyali chae ki Table pe rakh ke sar-nigun uTThi

KHayalon aur KHwabon ki wo duniya DhunDne nikli

wo soha rang jis mein amman meri sari rangti thin

wo afshan abraqon ki jo sitaron si chamakti thin

wo mehndi jis ki surKHi se koi surKHi na milti thi

wo missi jis se bu beli chameli ki nikalti thi

meri hamraaz kirnen tujh ko main ab kaise samjhaun

teri aaghosh ko in KHushbuon se kaise mahkaun

ye ujli aur ThanDi dhup mein phaili hui shaKHen

main in barfili shaKHon mein kahan se phul le aaun