ai ruh-e-zindagi

ai rūh-e-zindagī

ai ḳhudā kī quvvat-e-taḳhlīq

kaun sī na.ī duniyā.eñ ābād karne meñ masrūf ho ga.ī hai tū

is hamārī duniyā kī jānib bhī palaT kar dekh

jo lamha-ba-lamha vīrān se vīrān-tar hotī jā rahī hai

ai rūh-e-zindagī

ai avvalīn raushnī kī abadī lau

maut ke añdheroñ ko chīrtī huī aa

dekh maiñ baazū khole khaḌā huuñ

aa aur apnī lapeT meñ le le mujhe

merī āñkhoñ se dekh

mere zehn se soch

mere ḳhvāboñ meñ utar kar maḳhlūq-e-ḳhudā kī ārzūoñ kā andāza kar

mere dil meñ paḌāv kar

is ke shikasta ā.īne meñ hamārī hālat dekh

aur naġhma chheḌ

jo kamzoroñ kī TuuTī huī himmat ko az-sar-e-nau javān kar de

vo suur phūñk

jo zālimoñ ke dast o baazū ko toḌ kar rakh de

vo aah bhar jo fāqoñ martī maḳhlūq par rizq kī bārish ban kar baras jaa.e

vo sadā kar

jo nīyat ke futūr ko husn-e-ḳhayāl meñ

aur natīje kī aziyyat ko husn-e-amal meñ badal de

ai rūh-e-zindagī

ai ḳhudā kī quvvat-e-iz.hār

merī duniyā meñ tere rañg phīke paḌ ga.e haiñ

dekh arboñ insān jīte-jī mar rahe haiñ

nā-insānī bad-amnī māyūsī bīmārī aur jahālat ne

terī tasvīr meñ maut ke rañg bharne shurūa kar diye haiñ

aa, aur bol mere andar se

aa, merā kalām ban jā bayān ban jā merā qalam ban jā mū-qalam ban jā

aa, insāf amn aur āzādī ko tarse huoñ kī ummīd ban jā

aa, dostī mohabbat aur barābarī se mahrūm maḳhlūq kī Dhāras bañdhāne aa

aa, aur jaldī aa

ki tujhe pukārte pukārte kahīñ maiñ haath toḌ kar na baiTh jā.ūñ

ai ruh-e-zindagi

ai KHuda ki quwwat-e-taKHliq

kaun si nai duniyaen aabaad karne mein masruf ho gai hai tu

is hamari duniya ki jaanib bhi palaT kar dekh

jo lamha-ba-lamha viran se viran-tar hoti ja rahi hai

ai ruh-e-zindagi

ai awwalin raushni ki abadi lau

maut ke andheron ko chirti hui aa

dekh main bazu khole khaDa hun

aa aur apni lapeT mein le le mujhe

meri aankhon se dekh

mere zehn se soch

mere KHwabon mein utar kar maKHluq-e-KHuda ki aarzuon ka andaza kar

mere dil mein paDaw kar

is ke shikasta aaine mein hamari haalat dekh

aur naghma chheD

jo kamzoron ki TuTi hui himmat ko az-sar-e-nau jawan kar de

wo sur phunk

jo zalimon ke dast o bazu ko toD kar rakh de

wo aah bhar jo faqon marti maKHluq par rizq ki barish ban kar baras jae

wo sada kar

jo niyat ke futur ko husn-e-KHayal mein

aur natije ki aziyyat ko husn-e-amal mein badal de

ai ruh-e-zindagi

ai KHuda ki quwwat-e-izhaar

meri duniya mein tere rang phike paD gae hain

dekh arbon insan jite-ji mar rahe hain

na-insani bad-amni mayusi bimari aur jahaalat ne

teri taswir mein maut ke rang bharne shurua kar diye hain

aa, aur bol mere andar se

aa, mera kalam ban ja bayan ban ja mera qalam ban ja mu-qalam ban ja

aa, insaf amn aur aazadi ko tarse huon ki ummid ban ja

aa, dosti mohabbat aur barabari se mahrum maKHluq ki Dhaaras bandhane aa

aa, aur jaldi aa

ki tujhe pukarte pukarte kahin main hath toD kar na baiTh jaun