ajab tha dasht-e-bala ka manzar

ajab thā dasht-e-balā kā manzar

jahāñ na.ī nafratoñ ke ḳhanjar

purānī rasm-e-vafā ke dil meñ utar ga.e the

jahāñ parāyoñ kī sāzish-e-be-amāñ ke baa.is

lahū ke rishte bhī dushman-e-jāñ bane hue the

jahāñ zamīñ par ḳharīf-e-ātish ugī huī thī

jahāñ fazā meñ tuyūr-e-āhan ubhar rahe the

tumhāre azm-e-javāñ ne aksar

na.e ḳhayāloñ kā nuur baḳhshā thā āgahī ko

koī bhī tārīḳh pā-ba-jaulāñ na kar sakī thī

tumhārī āzad-o-āsmāñ-gīr zindagī ko

shikast hargiz na de sakī thī

tumhāre jazboñ tumhāre pindār-e-bandagī ko

magar ye kyā inqalāb aayā

ki bijliyoñ ko bhī tauq meñ ham asiir dekheñ

talātumoñ ke jigar meñ paivast tiir dekheñ

sahar ho yā shaam har ufuq par

tumhāre ḳhuuñ kī lakīr dekheñ

mujhe gumāñ hai ki is shikast-e-zubūñ ke pīchhe

hamārā apnā bhī haath hogā

ye shām-e-zindāñ ye chup fazā ye udaas mausam

har ek shai meñ ḳhamosh tūfāñ chhupā huā hai

tumhāre zehnoñ kī TūTī-phūTī sī bairakoñ meñ

hazār-hā ḳhvāhishoñ kā melā lagā huā hai

abhī hamārā zamīñ se rishta rahegā qaa.em

payām ik din suneñge tajdīd-e-zindagī kā

na.e sahāre ḳhulūs kī bārisheñ kareñge

chaman khileñge tilism TūTegā bebasī kā

hamārī maa.eñ hamārī bahneñ hamāre bachche

lipaT ke ham se

kareñge iz.hār ahd-e-rafta kī bekalī kā

miTegā dard-e-firāq ujḌī suhāganoñ kā

har ek āñgan meñ daur aa.egā sarḳhushī kā

mere vatan ke ġhayūr beTo

tumhārī taqdīr-e-be-gunāhī pe dam-ba-ḳhud haiñ tamām qaumeñ

zamīr-e-insāñ tumhāre ġham se kisī tarah be-ḳhabar nahīñ hai

yaqīn jaano tumhāre ayyām-e-ibtilā ḳhatm ho chuke haiñ

yaqīn jaano jahān-e-tāza meñ qaht-e-fikr-o-nazar nahīñ hai

tumhārī mī.ād-e-āzmā.ish kā faisla mo'atabar nahīñ hai

tumhārā sayyād be-basar hai ye daur to be-basar nahīñ hai

ajab tha dasht-e-bala ka manzar

jahan nai nafraton ke KHanjar

purani rasm-e-wafa ke dil mein utar gae the

jahan parayon ki sazish-e-be-aman ke bais

lahu ke rishte bhi dushman-e-jaan bane hue the

jahan zamin par KHarif-e-atish ugi hui thi

jahan faza mein tuyur-e-ahan ubhar rahe the

tumhaare azm-e-jawan ne aksar

nae KHayalon ka nur baKHsha tha aagahi ko

koi bhi tariKH pa-ba-jaulan na kar saki thi

tumhaari aazad-o-asman-gir zindagi ko

shikast hargiz na de saki thi

tumhaare jazbon tumhaare pindar-e-bandagi ko

magar ye kya inqalab aaya

ki bijliyon ko bhi tauq mein hum asir dekhen

talatumon ke jigar mein paiwast tir dekhen

sahar ho ya sham har ufuq par

tumhaare KHun ki lakir dekhen

mujhe guman hai ki is shikast-e-zubun ke pichhe

hamara apna bhi hath hoga

ye sham-e-zindan ye chup faza ye udas mausam

har ek shai mein KHamosh tufan chhupa hua hai

tumhaare zehnon ki TuTi-phuTi si bairakon mein

hazar-ha KHwahishon ka mela laga hua hai

abhi hamara zamin se rishta rahega qaem

payam ek din sunenge tajdid-e-zindagi ka

nae sahaare KHulus ki barishen karenge

chaman khilenge tilism TuTega bebasi ka

hamari maen hamari bahnen hamare bachche

lipaT ke hum se

karenge izhaar ahd-e-rafta ki bekali ka

miTega dard-e-firaq ujDi suhaganon ka

har ek aangan mein daur aaega sarKHushi ka

mere watan ke ghayur beTo

tumhaari taqdir-e-be-gunahi pe dam-ba-KHud hain tamam qaumen

zamir-e-insan tumhaare gham se kisi tarah be-KHabar nahin hai

yaqin jaano tumhaare ayyam-e-ibtila KHatm ho chuke hain

yaqin jaano jahan-e-taza mein qaht-e-fikr-o-nazar nahin hai

tumhaari miad-e-azmaish ka faisla mo'atabar nahin hai

tumhaara sayyaad be-basar hai ye daur to be-basar nahin hai