امر ہے اور رہے گا نام گاندھی

وہی جو ہو کے خاکستر گیا ہے

زمانے بھر کا دامن بھر گیا ہے

جلا کر آشیاں ہستی کا اپنی

سجا کر کتنے بام و در گیا ہے

جلا کر دہر میں شمعیں وفا کی

پلٹ کر آج اپنے گھر گیا ہے

نہ جانا روٹھ کر اب اس چمن سے

بہاروں کو نصیحت کر گیا ہے

نہ اترے گا ابد تک نشہ جس کا

پلا کر ہم کو وہ ساغر گیا ہے

خیالوں میں بسا رہتا ہے ہر دم

نگاہوں سے جو پردہ کر گیا ہے

نہ جائے گی خلش تا حشر جس کی

چبھو کر دل میں وہ نشتر گیا ہے

امر ہے اور رہے گا نام گاندھی

یقیں آتا نہیں وہ مر گیا ہے