اندھیری بستی

وقت شاہد ہے کہ ہر دور میں تہذیب کی مانگ

قتل گاہوں کے تبسم سے شفق رنگ رہی

جن کے خوں سے ہے رخ زیست کی رنگت ان کی

بھوک افلاس کی ناگن سے سدا جنگ رہی

جن کی محنت سے ہے محلوں کے مکینوں کا غرور

زندگی ان کے لئے دکھ کی اندھیری بستی

لوٹ قدرت کی مشیت ہے خدا کا منشا

اس کھلے جھوٹ کی تائید نہیں ہو سکتی

دھوپ کی آتشیں چادر میں جھلستا ہوا جسم

کتنی صدیوں سے ہے تاریخ تشدد کا جمال

حکم ہے مقتل و زنداں کے نگہبانوں کا

آدمیت کے تقدس کا اٹھاؤ نہ سوال

عشرت زیست مقید رہی ایوانوں میں

اہل محنت کے لئے درد کا سرمایہ ہے

چند افراد نے فطرت کا تقاضا کہہ کر

ظلم کو عشق کی تقدیر بنا رکھا ہے

خوف کے ابر سے انصاف کی شبنم برسے

اس حقیقت کی حقیقت کو کوئی کیا سمجھے

لوٹنے والے خدایان جہاں ٹھہرے ہیں

اس تمدن کے تقدس کو بھلا کیا کہئے

جھوٹ ہر سچ کی ہے بنیاد جہاں کیا کہئے

جرم اظہار صداقت ہے یہاں کیا کہئے