apne apne suraKHon ka Dar

''na.ī saḌkoñ ke naqshe'' kār-ḳhāne

ūñche ūñche pul mire mansūbe dekho aur kitāboñ meñ paḌho''

us ne kahaa... ''mere badan par haath bhī phero

magar sūrāḳh se uñglī alag rakkho''

magar us ke badan par har taraf sūrāḳh hī sūrāḳh haiñ

uñglī alag rakkho!

to kyā maiñ uñgliyoñ ko toḌ duuñ?

maiñ uñgliyoñ ko toḌ duuñ?

phir kaun tere husn kī tafsīr likkhegā? batā!

phir ye tasalsul raat din kā

chāñd sūraj kā akele mausamoñ kā

mas.aloñ aur mushkiloñ kā

kaise TūTegā? batā!

us ne hameñ ek dūsre se chhup ke rahne ke liye

kapḌe diye aur ḳhūbsūrat ghar diye

aur band kamroñ meñ zamīnoñ āsmānoñ kī sabhī sachchā.iyāñ kahne aur un

par bahs karne aur mansūbe banāne kī khulī āzādī dī

yāro! chalo saḌkoñ pe nañge sair karne jaa.eñ

shāyad rasm chal nikle

magar mere qabīle kā koī bhī mard

kapḌe phaaḌ kar ghar ko jalā ke

nañgī nañgī bāteñ kahne ke liye bāhar na niklā

sab ko apne apne sūrāḳhoñ kā Dar thā

nai saDkon ke naqshe kar-KHane

unche unche pul mere mansube dekho aur kitabon mein paDho

us ne kaha mere badan par hath bhi phero

magar suraKH se ungli alag rakkho

magar us ke badan par har taraf suraKH hi suraKH hain

ungli alag rakkho!

to kya main ungliyon ko toD dun?

main ungliyon ko toD dun?

phir kaun tere husn ki tafsir likkhega? bata!

phir ye tasalsul raat din ka

chand suraj ka akele mausamon ka

masalon aur mushkilon ka

kaise TuTega? bata!

us ne hamein ek dusre se chhup ke rahne ke liye

kapDe diye aur KHubsurat ghar diye

aur band kamron mein zaminon aasmanon ki sabhi sachchaiyan kahne aur un

par bahs karne aur mansube banane ki khuli aazadi di

yaro! chalo saDkon pe nange sair karne jaen

shayad rasm chal nikle

magar mere qabile ka koi bhi mard

kapDe phaD kar ghar ko jala ke

nangi nangi baaten kahne ke liye bahar na nikla

sab ko apne apne suraKHon ka Dar tha